Mark Zuckerberg ya kare Facebook kan zaben Trump

Mark Zuckerberg Hakkin mallakar hoto Getty Images
Image caption Mark Zuckerberg ya ce bangaren Trump da na Clinton sun watsa labaran kanzon-kurege a lokacin yakin neman zabe

Mai kamfanin sada zumunta na Facebook Mark Zuckerberg ya kare shafin saboda zargin da aka yi masa cewa Facebook ne ya rika watsa labaran kanzon-kurege da suka bai wa Donald Trump nasarar zama shugaban Amurka.

Mr Zuckerberg, wanda ya yi jawabi a wurin wani taro kan fasaha da aka yi a California, ya ce bai kamata a dora wa Facebook alhakin cin zaben Trump ba.

A cewarsa, "Tunanin da wasu ke yi cewa Facebook ya watsa labaran kanzon-kuregen da suka yi tasiri a zaben kasar nan ba daidai ba ne."

Shugaban kamfanin na Facebook ya kara da cewa duk wanda ya amince cewa Facebook ya yi tasiri a zaben, bai fahimci irin sakonnin da magoya bayan Trump ke son isar wa a lokacin yakin neman zabe ba.

Wasu bayanai dai sun nuna cewa an rika watsa labaran karairayi wadanda suka bai wa Trump damar yin nasara fiye da labarai na gaskiya a shafin Facebook.

Mutane da dama, musamman Amurkawa, sun mayar da Facebook wani dandali da suka fi samun labarai.

Labarai masu alaka