Zaben 2019: 'Atiku da El-Rufai na sha'awar takara'

Buhari Hakkin mallakar hoto Getty Images
Image caption Wasu na hasashen Buhari ba zai sake tsayawa takara ba saboda tsufa

Masana harkokin siyasa a Najeriya sun ce rikicin da ya barke tsakanin tsohon mataimakin Shugaban kasar Atiku Abubakar da Gwamna Nasir El-Rufai na jihar Kaduna wata alama ce da ke nuna cewa an soma buga gangar siyasar shekarar 2019.

Ce-ce-ku-ce ya barke tsakanin jiga-jigan jam'iyyar ta APC mai mulkin ne sakamakon zargin da suke yi wa juna da aikata laifuka daban-daban.

Gwamnan jihar Kaduna da ke Najeriya, Nasir El-Rufai ya yi zargin cewa tsohon mataimakin shugaban kasar Alhaji Atiku Abubakar yana yin zagon-kasa ga gwamnatin Shugaba Muhammadu Buhari.

El-Rufai na yin raddi ne ga zargin da Atiku ya yi cewa shi butulu ne, kuma ya saba wa ka'idojin aikin gwamnati a lokacin da yake rike da mukamai a gwamnatin Olusegun Obasanjo.

Hakkin mallakar hoto NASIR EL-RUFAI
Image caption Nasir El-Rufai ya dade yana rigima da Atiku

A wata hira da Premium Times ta wallafa, Atiku ya ce shi ya shigar da El-Rufai gwamnati har ya zama minista, amma da shi "aka yi amfani wurin zargina da cin hanci", abin da kotu ta wanke ni daga baya.

Sai dai a wata sanarwa da ya fitar, gwamnan El-Rufai ya yi zargin cewa cin hanci da rashawa sun dabaibaye Atiku, abin da ya sa yake tsoron zuwa Amurka.

'An ja zare'

Amma a wata hira da ya yi da BBC, Dr Abubakar Kari na Jami'ar Abuja, ya ce rikicin da ke tsakanin mutanen biyu tamkar share fage ne ga harkokin siyasar shekarar 2019.

Hakkin mallakar hoto Getty Images
Image caption Atiku ya dade yana son yin shugabancin Najeriya

A cewarsa, "An fara gwagwarmaya ce ta takarar shugabanci a zaben shekarar 2019. Ana rade-radin cewa El-Rufai da Atiku dukkan su suna sha'awar yin takara.

Abin da wannan hayaniya tasu ta nuna shi ne kowannen su yana neman gindin-zama ne."

Ya kara da cewa duk da yake Shugaba Muhammadu Buhari bai taba cewa ba zai tsaya takara a 2019 ba, wasu na ganin ya tsufa don haka zai iya ja da baya domin wasu su karba.

Kuma aganinsa hakan ne ya sa El-Rufai da Atiku ke son nuna wa duniya cewa a shirye suke su maye gurbin Shugaba Buhari.