MDD: Amina Mohammed ta zamo mataimakiyar Sakatare-Janar

Ministar Muhalli na Najeriya Amina Mohammed Hakkin mallakar hoto Facebook
Image caption Amina Mohammed tana da kwarewa wurin aiki a Majalisar Dinkin Duniya

Sakatare-Janar na Majalisar Dinkin Duniya mai jiran gado, Antonio Guterres, ya nada Ministar muhalli ta Najeriya Amina Mohammed a matsayin mataimakiyarsa.

Mista Guterres ya kuma nada wasu mata biyu a wasu manyan mukamai a majalisar.

Guterres ya mayar da hankali sosai wajen daidaita sahu tsakanin maza da mata, a wa'adinsa da zai fara daga ranar 1 ga watan Junairun 2017.

Babbar jami'a a ma'aikatar harkokin wajen Brazil, Maria Luiza Ribeiro Viotti ce za ta rike mukamin shugabar ma'aikata a ofishin sabon sakatare-janar din.

Ita kuma Kyung-wha daga Koriya Ta Kudu, an nada ta a matsayin mai bayar da shawara kan tsare-tsare.

Dama an yi ta rade-radin cewa za a nada Amina Mohammed a wannan mukami ganin irin nasarar da ta yi wurin jagorantar yarjejeniyar sabbin muradun karni na ci gaba mai dorewa da aka kulla.

Viotti kuma, wacce ita ce mataimakiyar sakataren Brazil a Asiya da yankin Pacific a yanzu, ta yi aiki a matsayin jakadar Brazil a Jamus, kuma ta wakilci Majalisar Dinkin Duniya a kasar.

Labarai masu alaka