Pogba ya gana da limamin Masallacin Madina

Pogba Hakkin mallakar hoto Masjid Al Haram Makkah
Image caption Ɗan wasan ya ce yana yi wa Musulmi barka da azumi

Ɗan wasan kulob din Manchester United Paul Pogba ya gana da limamin masallacin Annabi (SAW) a birnin Madina, Sheikh Ali Bin Abdur Rahman Al Hudhaify, yayin da yake ci gaba da aikin Umara a kasar Saudiyya.

Sai dai ba a san abin da suka tattauna ba tukuna.

Pogba ya isa kasar ne a makon jiya don fara aikin Umarah a watan azumin Ramadan.

Kamar yadda ya bayyana a shafinsa na Instagram gabanin tafiyarsa Saudiyya, Pogba ya ce yana kan hanyarsa ta zuwa birnin Makkah domin godewa Allah kan nasarar da suka samu a kakar bana.

Tun bayan isarsa Saudiyya ne hotunan dan wasan suka karade kafofin sadarwa a duniya, ciki har da wadanda ya dauka a gaban Harami da dai sauransu. Kuma sabanin yadda aka saba ganinsa, akwai alamun karin nutsuwa a tare da shi.

Rahotannin kafafen yada labarai sun ce Pogba, wanda dan kasar Faransa ne, yana yin ibadarsa ta addinin Musulunci.

Pogba ya koma United a bara daga Juventus a matsayin dan wasan da ya fi kowanne tsada a duniya.

Hakkin mallakar hoto Masjid Al Haram Makkah
Image caption Pogba ne dan wasan da ya fi tsada a duniya