An ba da umurnin kama kakakin Shi'a a Kaduna

Hakkin mallakar hoto AFP
Image caption Mabiya Shi'a a lokacin da suke gangami a Nigeria

Gwamnatin jihar Kaduna a Njeriya ta umurci kwamishinan 'yan sandan jihar da ya sa a kama mutumin dake ikirarin zama kakakin kungiyar 'yan uwa Musulmi ta 'yan Shia a jihar, Malam Ibrahim Musa, tare da hukunta shi.

A cikin wata sanarwa da kakakin gwamnatin jihar Kaduna, Samuel Aruwan ya fitar, gwamnatin ta ce ta bada umurnin ne saboda yadda Malam Ibrahim Musa ya bayyana kan shi a matsayin dan kungiyar, bayan wasu sa'o'i da fara aiki da wata doka da ta haramta kungiyar ta 'yan Shi'a a jihar.

Bayan gwamnatin jihar ta sanar da haramta kungiyar ne, Ibrahim Musa, ya mayar da martani a madadin kungiyar, yana mai cewa za su kalubalanci matakin na gwamnati.

Sanarwar gwamnatin ta kuma bukaci dukkan hukumomin tsaro a jihar da su tabbatar da aiki da dokar da ta haramta kungiyar ta Shi'a a jihar, ta hanyar kama Ibrahim Musa.

Gwamnatin ta bayyana ikirarin da kakakin kungiyar ya yi a matsayin rashin mutunta umurninta, a don haka ta ce ba za ta bar wani ko wata kungiya suka karya doka ba.

Sai dai, Malam Ibrahim Musa ya shaidawa BBC cewa ba zai gabatar da kanshi ga hukumomi ba kamar yadda gwamnatin ta bukata.

Ya ce bai yi mamaki da umurnin kama shin ba, sannan ya yi Allah wadai da shi.

Malam Ibrahim Musa ya ce ya mika batun ga lauyoyin shi, domin su yi nazari a kanshi.

Ya kuma ce a ranar Lahadi, jami'an tsaro sun killace su lokacin da suke taron Ashura a Zaria, sannan an kama wasu 'yan uwansu goma sha biyar a birnin Kaduna, tare da harbin daya a kafa.

Hakkin mallakar hoto AP
Image caption Ana tsare da Sheikh Ibraheem Zakzaky tun watan Disamba

Martanin kungiyar 'yan uwa Musulmi

Bayan harmata kungiyar da gwamunatin jihar Kaduna ta yi, Malam Ibrahim Musa ya ce za za su kaluabalanci wannan mataki na gwamnatin ta Kaduna.

"Muna Allah wadai da wannan matakin da gwamnatin jihar Kaduna ta dauka, ba mu yarda da shi ba, za mu kalubalance shi ta dukkan hanyar da ta dace inshaallahu." inji Ibrahim Musa.

Amma ya ce matakin bai basu mamaki ba, ganin irin take-taken hukumomin na Najeriya dangane da kungiyar.

Kakakin na 'yan shi'a yace duk abin da su ke yi bai saba dokokin Najeriaya ba.

Haramta kungiyar 'yan uwa Musulmi a Kaduna

A wata sanarwa da ta fitar ne dai ranar Juma'a gwamnatin ta jahar Kaduna ta ce ta soke wannan kungiya, haka kuma ta haramta dukkan ayyukan ta a dukkan fadin jahar.

Mai magana da yawun gwamnan Kaduna Nasiru El-Rufa'i, ya ce za a daure duk wanda aka samu yana aiki a matsayin dan kungiyar, tsawon shekaru bakwai a gidan yari.

Samuel Aruwan ya ce gwamnati ta dauki matakin ne, ta yin amfani da karfin da tsarin mulki ya bata, domin tabbatar da tsaro, da bin doka da oda, da zaman lafiya a jihar.

Daruruwan mutane ne suka mutu lokacin da aka yi arangama a watan Disamba tsakanin 'yan kungiyar da sojojin Najeriya bayan sojin sun yi zargin cewa 'yan Shi'a sun yi yunkurin halaka shugabansu, Laftanar Janar Yusuf Buratai.

Sai dai 'yan kungiyar sun musanta zargin, suna masu cewa sojoji sun kashe dubban mabiyansu.

Hukumomi na tsare da Shugaban kungiyar Sheikh Ibraheem Zakzaky tun watan Disamba.

Hakkin mallakar hoto AFP
Image caption Mabiya Shi'a a lokacin da suke gangami a Nigeria

Dalilan haramta kungiyar

  • Kwamitin binciken rikicin da aka yi a Zaria a watan Disamba ya gano cewa kungiyar ba ta da rajista
  • Wani bangare na kungiyar Shi'a na dauke da makamai
  • 'Yan kungiyar ba sa martaba dokar kasa
  • Kuma ba sa mutunta hukumomi
  • Tun bayan rikicin na Zaria kungiyar bata daina taron muzahara ba
  • Kungiyar na mamaye makarantu da rufe hanyoyi ba tare da la'akari da hakkin jama'a ba

Kungiyar na da mabiya a sassan Najeriya da dama, amma wannan mataki zai yi aiki ne a jihar Kaduna kawai, inda nan ne hedikwatar ta 'yan Shi'a a kasar take.

Gwamnatin ta ce wannan mataki, wanda ya fara aiki a ranar Juma'a, ba a dauke shi ba ne domin hana mutane gudanar da addininsu kamar yadda dokar kasa ta basu dama.

Sai dai ta ce wannan dama tana da iyaka ta yadda ba za a amince ta tauye wa wasu hakkinsu ba.

Karin bayani