Ina neman gafarar Rahama Sadau — Classiq

Rahama Sadau ta dare bayan Classiq a sabon faifan bidiyon wakarsa da ya fitar mai suna "I Love You"
Image caption MOPPAN ta ce rungumar Classiq da Rahama Sadau ta yi ta saba da ka'idojin kungiyar

Mawakin nan mai suna Classiq wanda ya yi waka tare da rungume-rungume da Rahma Sadau, ya ce, yana neman afuwar jarumar.

Mawakin, a shafinsa na Instagram, ya ce "fitowar faifan wakarsa da ya yi wa lakabi da 'i love you' ta jawo kace-nace."

A saboda haka ne Classiq ya ce " zan so na nemi gafarar Rahma Sadau saboda irin halin da wakata ta jefa a ciki."

Classiq ya kara da neman afuwar masoya Rahama Sadau.

To amma mawakin ya bayyana jarumar da mai hazaka da jajircewa, a inda ya ce ba zai yi kasa a gwiwa ba wajen kasancewa tare da Rahma Sadau.

A 'yan makonnin da suka gabata ne dai kungiyar masu hada fina-finan Hausa wato MOPPAN, ta sanar da korar Rahma Sadau daga harkokin fim.

Image caption Rahama Sadau da Classiq sun nuna shaukin sosayya a wakar
Image caption Wannan ne karon farko da ta fito a wakar turanci