Nigeria: Buhari ya rantsar da sabon alkalin alkalai

Mukaddashin mai shari'a na Nigeria Walter Onnoghen Hakkin mallakar hoto Nigerian Government

Shugaban Najeriya Muhammadu Buhari ya rantsar da Walter Onnoghen a matsayin alkalin alkalan kasar na riko.

Mista Onnoghen ya maye gurbin mai shari'a Mahmud Mohammed wanda ya yi ritaya a ranar Laraba.

An yi bikin rantsuwar ne a fadar shugaban kasar da ke Abuja.

Mai shari'a Walter Onnoghen ya karbi wannan mukami ne a daidai lokacin da fannin shari'ar kasar ke cikin mawuyacin hali saboda zargin cin hanci da rashawa.

A watan da ya gabata ne jami'an tsaro suka kame wasu manyan alkalai bakwai a wani bangare na binciken da ake yi.

Hukumomi sun ce sun gano dubban daloli a gidajen alkalan, wadanda aka bayar da belinsu, amma har yanzu ba a tuhume su a kotu ba.

Batun dai ya raba kan lauyoyi da sauran masu ruwa da tsaki a fagen shari'ar kasar.

Labarai masu alaka