Tsohon shugaban kasar Cuba Fidel Castro ya mutu yana da shekara 90

Fidel Castro ya jagoranci juyin-juya-halin da jam'iiyar Communist ta yi a Cuba a 1959 Hakkin mallakar hoto AFP/Getty Images
Image caption Fidel Castro ya jagoranci juyin-juya-halin da jam'iiyar Communist ta yi a Cuba a 1959

Tsohon shugaban kasar Cuba Fidel Castro kuma shugaban juyin-juya-halin Kwaminisanci ya mutu yana da shekara 90, a cewar dan uwansa Raul Castro.

Shugaba Raul Castro ya ce, "Babban kwamandan juyin-juya-halin kasar Cuba ya mutu da misalin karfe goma da minti 22 na daren Asabar."

An ayyana zaman makokin kwana tara sakamakon mutuwar tsohon shugaban kasar.

Fidel Castro ya shugabanci Cuba a matsayin kasa mai bin jam'iyya daya tsawon kusan shekara 50 kafin dan uwansa Raul ya karbi mulki a shekarar 2006.

Masu goyon bayansa sun ce ya bauta wa al'umar kasar Cuba.

Sai dai ana zarginsa da murkushe 'yan adawa.

Shugaba Raul Castro ya gabatar da jawabi ta gidan talabijin din kasar, inda ya ce Fidel Castro ya mutu kuma za a kona gawarsa ranar Asabar.

'Cuba za ta ci gaba da yin nasara'

Kazalika za a kwashe kwana da kwanaki ana yin makokin mutuwarsa.

Raul Castro ya kammala jawabinsa da yin wani take na juyin-juya hali, inda ya ce: "Nasara tamu ce, kodayaushe!"

Fidel Castro ya dade da fita daga harkokin siyasa, idan aka cire wasu 'yan kalamai da yake yi a jaridun kasar.

A watan Afrilu, Fidel Castro ya yi wani jawabi da ba a cika ganin irin sa ba ranar da ake kammala babban taron jam'iyarsa ta Communist Party.

Ya yi tsokaci kan yadda girma ya zo masa, yana mai cewa duk da haka 'yan kasar Cuba za su ci gaba da yin nasara.

Na'urarku na da matsalar sauraren sauti
A watan Afrilu, Fidel Castro ya yi jawabin ba-zata

Castro - wanda ya tsallake yunkurin kisan da aka yi a kansa sau da dama - shi ne shugaban da ba Basarake ba ya fi dadewa a kan mulki a karni na 20.

Wasu fitattun ranaku a rayuwar Fidel Castro

Hakkin mallakar hoto AFP/Getty Images
  • 1926: An haife shi a Oriente, lardin da ke yamma maso gabashin Cuba
  • 1953: An daure shi bayan ya jagoranci wani yunkurin tumubuke gwamnatin Batista da bai yi nasara ba
  • 1955: An sake shi daga gidan yari bayan an yi masa afuwa
  • 1956: Shi da Che Guevara suka fara yakin sari-ka-noke
  • 1959: Ya kayar da Batista, inda ya zama Firai Ministan Cuba
  • 1961: Ya yaki mamayar da kungiyar Bay of Pigs, wacce CIA ke mara wa baya
  • 1962: Ya tayar da jijiyoyin wuya kan makamai masu linzami bayan ya amince cewa tsohuwar tarayyar Sobiat za ta iya aikewa da makaman zuwa Cuba
  • 1976: Majalisar dokokin Cuba ta zabe shi a matsayin shugaban kasa
  • 1992: Ya cimma jarjejeniya da Amurka kan 'yan gudun hijirar Cuba
  • 2006: Ya sauka daga shugabancin kasar saboda rashin koshin lafiya

Labarai masu alaka