Ginin coci ya rufta kan mutane da dama a Nigeria

Akwa Ibom Hakkin mallakar hoto Daily Post

Mutane da dama ne ake fargabar sun mutu bayan da ginin wani coci ya rufta a birnin Uyo na jihar Akwa Ibom a kudancin Najeriya.

Rahotanni sun ce Majami'ar Reigners Bible Church, ta cika makil saboda ana bikin nada shugabanta a matsayin Bishop a lokacin da lamarin ya faru.

Kafafen yada labarai a Najeriya sun ambato wadanda suka shaida lamarin na cewa ana kan yi wa ginin kwaskwarima saboda hasashen cewa jama'a da dama za su halacci taron.

Wani ganau ya ce "Ana cikin bikin nada Fasto Akan Week kwatsam sai ginin ya rufta baki daya".

Ya kara da cewa "Mutane da dama sun makale a kuraguzan ginin a daidai lokacin da masu aikin ceto ke cigaba da kai dauki."

An sa ran Gwamnan jihar Udom Emmanuel zai halarci taron, amma rahotanni sun ce ba ya wurin lokacin da hadarin ya faru.

Shafin labarai na Premium Times ya ce an garzaya da wadanda suka ji raunuka zuwa asibitoci da dama a fadin birnin.

Ana ywan samun ruftawar gine-gine a Najeriya, abin da masu sharhi ke alakanta wa da rashin bin doka da amfani da kayan aiki marasa kyau.

Akalla mutum 115 ne suka mutu a watan Satumbar 2014 lokacin da wani gini mallakar Cocin Fasto TB Joshua ya rufta a birnin Lagos.

Labarai masu alaka