Da gaske ne Sergio Ramos ya ɗaga tutar Nigeria?

Hakkin mallakar hoto Getty Images
Image caption Sergio Ramos (a tsakiya, rike da kofi) ya koma Real Madrid ne daga Sevilla a kan Euro miliyan 27 a shekarar 2005

A ranar Asabar ne kulob ɗin ƙwallon ƙafa na Real Madrid ya lashe kofin Gasar Zakarun Turai bayan doke Juventus da ci 4-1 - karo na biyu a jere da kulob ɗin ya lashe kofin.

Sai dai yayin da 'yan wasa da magoya bayan Real Madrid suke murna da farin ciki da samun wannan nasarar, an ga kaftin ɗin Madrid, Sergio Ramos, ɗaure da wata tuta mai launi iri ɗaya da ta Najeriya a jikinsa.

Hakan ya jefa jama'a da dama cikin mamaki musamman ma'abota shafukan sada zumunta a Najeriya, kan ko ɗan wasan yana da wata dangantaka da Najeriya ne.

Hakkin mallakar hoto Getty Images
Image caption Ramos tare da 'ya'yansa bayan lashe kofin zakarun Turai a filin wasa na Cardiff ranar Asabar

Akwai kuma wasu da suke tunanin ko shi ɗan asalin Najeriya ne da dai sauransu. Hakazalika, wasu suna cewa ya yi hakan ne don ya martaba magoya bayan Madrid da ke Najeriya.

Hakkin mallakar hoto TWITTER
Image caption Yadda jama'a suka yi ta tattaunawa a shafin Twitter kan ko dan wasan yana da dangantaka da Najeriya

Binciken da BBC ta yi ya gano cewa Sergio Ramos ɗan asalin kasar Spain ne, kuma ba shi da wata dangantaka da Najeriya.

Har ila yau, tutar da aka ga ɗan wasan da ita bayan sun lashe kofin Zakarun Turai tutar wani yanki ne mai ƙwarya-ƙwaryar 'yanci a ƙasar Spain wato Andalusia, amma ba tutar Najeriya ba ce.

Wato tutar yankin da aka haifi ɗan wasan ne.

Tutar Andalusia tana yin kama sosai da ta Najeriya, inda duka tutocin suke da launin kore da fari da kuma kore.

Bambancin kawai ta fuskoki biyu ne:

An jera launin kore da fari da kuma kore daga kwance ne. Ta Najeriya kuma launukan a tsaye aka jera su.

Tutar Najeriya ta bambanta da wadda Ramos ya ɗaura ta fuskar ita ta Andalusia tana da hoton kan sarki a tsakiyarta, yayin da ta Najeriya ba ta da hoton komai a tsakiya.

Hakkin mallakar hoto Getty Images
Image caption Ɗan siyasa Juan Carlos Monedero daga yankin Andalusia yana riƙe da tutar yankin, kwanakin baya a Spain

Labarai masu alaka