Kenya: Kotu ta soke zaben Shugaba Uhuru Kenyatta

Na'urarku na da matsalar sauraren sauti
'Yan adawar Kenya na murnar samun nasara

Kotun kolin kasar Kenya ta soke sakamakon zaben shugaban kasar da aka gudanar a watan Agusta.

Kotun ta ce ta gano cewa an tafka kura-kurai, saboda haka ta ba da umarnin a sake sabon zabe cikin kwana 60 masu zuwa.

Babban alkali Justice David Maraga ya ce: "Mun ayyana wannan zaben shugaban kasar da aka gudanar ranar 8 ga watan Agostan 2017, a matsayin wanda ba a gudanar bisa kundin tsarin dokar kasa ba, wanda hakan ya sa muka soke shi baki daya."

Ya ci gaba da cewa: "Na biyu kuma, Mun ayyana cewa ba a zabi shugaba Uhuru Kenyatta a matsayin shugaban kasa ba."

"Na uku kuma, Muna umartar hukumar zaben kasar da ta sake gudanar da sabon zabe cikin kwanaki sittin, bisa tsarin dokar kasar," in ji alkalin.

Hukumar zaben kasar ta bayyana shugaban kasa mai ci Uhuru Kenyatta a matsayin wanda ya lashe zaben na watan Agusta.

Amma madugun gamayyar jam'iyyun adawa na National Super Alliance, NASA, Raila Odinga ya kalubalanci sakamakon, yana cewa an yi wa na'urar kyamfutar hukumar kutse domin a murde zaben.

Hakkin mallakar hoto Getty Images
Image caption Kenyatta ya fara zama shugaban kasar Kenya ne a shekarar 2013
Hakkin mallakar hoto Getty Images
Image caption Raila Odinga (na tsakiya) ya ce hukuncin kotun wani abin tarihi ne

Babban mai kalubalantar Mista Uhuru, Raila Odinga, ya ce: "Yau wata rana ce mai cike da tarihi ga mutanen Kenya har ma da mutanen nahiyar Afirka."

Jim kadan bayan sanar da hukuncin kotun ne magoya bayan Mista Odinga suka fara murna da shewa a kan titunan kasar musamman a birnin Kisumu inda 'yan adawa ke da rinjaye.

Wakiliyar BBC a Nairobi, Caroline Karobia ta ce Kenya ta kafa tarihi a matsayin kasa ta farko da ta soke zaben shugaban kasa a Afirka.

Har ila yau an ga magoya bayan jam'iyyun adawa suna murna a kotun bayan da aka bayyana hukuncin kotun kolin.

Labarai masu alaka