An sauke kwamandan rundunar yaki da Boko Haram

Commander of the Operation Lafiya Dole Major General Ibrahim Attahiru speaks at the army headquarters, in Maiduguri, Borno State in northcentral Nigeria, on October 4, 2017 Hakkin mallakar hoto AFP
Image caption An sa ran rundunar da Manjo Janar Attahiru Ibrahim ke jagoranta za ta yi nasara a yaki da BH

Rundunar sojin Najeriya ta sauke kwamandan da ke jagorantar yaki da kungiyar Boko Haram a kasar daga kan mukaminsa.

Hakan ya biyo bayan yawan hare-haren da 'yan kungiyar ke kai wa ne a baya-bayan nan, wadanda suka hada da wani hari da aka kai masallaci a garin Mubi, wanda ya yi sanadin mutuwar mutum 50.

Ba a dai bayar da wani dalili a hukumance na sauke Manjo Janar Attahiru Ibrahim ba.

Babban hafsan rundunar sojin kasa Tukur Buratai, ya ba shi wa'adi a watan Yuli don ya kawo shugaban kungiyar Boko Haram Abubakar Shekau a raye ko a mace cikin kwana 40.

A kalla mutum 20,000 aka kashe, yayin da kungiyar ta sace wasu dubbai, tun lokacin da kungiyar ta fara ayyukanta a arewa maso gabashin Najeriya a shekarar 2009.

Shugaba Muhammadu Buhari ya sha rantsuwar kama mulki ne a watan Mayun 2015, inda ya yi alkawarin murkushe mayakan.

Bayan wata bakwai da hawansa ne, ya ayyana cewa an yi nasara a yaki da kungiyar, bayan da sojoji suka kwato mafi yawan yankunan da ke karkashin ikon mayakan.

Sai dai kuma Boko Haram ta ci gaba da kai hare-haren bama-bamai a arewa maso gabshin kasar.

A watan Yuli ma, fiye da mutum 40 ne suka mutu a yayin wani aiki da sojoji suka yi don tserar da mutanen da mayakan Boko Haram suka yi wa kwanton-bauna a wani ayarin motoci.

Wadanda suka mutun sun hada da sojoji da wata tawagar masu hakao mai.

An nada Manjo Janar Attahiru Ibrahim ne don ya jagoranci yaki da Boko Haram a arewa maso gabashin Najeriya a watan Mayun wannan shekarar.

Ya maye gurbin Janar Nicholas Rogers ne, wanda ya jagoranci wata rundunar hadin gwiwa ta musamman ta sojoji da 'yan sanda, don dakile rikicin kabilanci a yankin tsakiyar Najeriya.


Boko Haram a takaice

Hakkin mallakar hoto AFP
Image caption Abubakar Shekau shi ne shugaban Boko Haram tun 2009
  • An kafa ta a shekarar 2002
  • Sunanta da Larabci shi ne, Jama'atu Ahlis Sunna Lidda'awati wal-Jihad
  • Ta fara aikinta ne da nuna kin jinin karatun boko
  • Ta kaddamar da kai hare-hare a shekarar 2009 da zummar samar da daular musulunci
  • Amurka ta ayyana ta a matsayin kungiyar ta'adda a 2013
  • Kungiyar ta ayyana wasu yankuna da ta kame a matsayin daulolin musulunci a shekarar 2014
  • A yanzu haka sojoji sun kwato mafi yawan yankunan

Labarai masu alaka