An sabunta: 31 ga Mayu, 2010 - An wallafa a 20:23 GMT

Majalisar dinkin duniya na yin taron gaggawa kan matakin sojin Isra'ila

Zauren kwamitin sulhun majalisar dinkin duniya

Zauren kwamitin sulhun majalisar dinkin duniya

Kwamitin sulhun Majalisar dinkin duniya na wani zaman gaggawa domin tattauna farmakin sojin da Isra'ila ta kai a kan jiragen ruwan dake dauke da masu fafutikar dake goyon bayan Palasdinawan dake kokarin karya shingen da aka yiwa Zirin Gaza.

Wakilin BBC a Majalisar dinkin duniya ya ce wani daftarin kudurin yayi Allah wadai da matakin Isra'ila sannan ya yi kiran da a gudanar da wani binciken kasashen duniya. Tun farko Amurka ta ce tayi matukar jin takaicin rayukan da aka rasa.

Masu fafutika akalla 9 ne aka kashe a lokacin da sojin kundubalar Isra'ila suka yi dirar mikiya a kan jiragen ruwan a cikin ruwayen kasa da kasa.

'Yan Isra'ila sunce sojojinsu sun dauki matakin ne domin kare kansu, to amma masu fafutika sun hakkake cewar sojojin ne suka bude wuta ba tare da wata tsokana ba.

Kasar Turkiya wadda ita ce kasar da da yawa daga cikin masu fafutikar da ke kan jiragen ruwan suka fito, na kan gaba a Allah wadan da kasashen duniya ke yi kan matakin da Isra'ila ta dauka a kan jerin gwanon jiragen ruwan.

A cikin wani jawabi mai kakkausan lafazi a taron kwamitin sulhun Majalisar dinkin duniya Ministan harkokin wajen Turkiya ya ce matakin na Isra'ila babban saba dokokin duniya ne.

Tun farko kuma Pirayim Mistan Turkiya, Recep Tayyip Erdogan ya zargi Isra'ila da aikata ta'addanci da kuma ya bukaci gudanar da wani taron gaggawa na kungiyar tsaro ta NATO.

  • Sojin Israila a kan jirgin ruwan agaji
    Sojin kundunbalan Israela sun yi dirar mikiya a kan wasu jerin gwanon jiragen ruwa shida na masu fafutuka dake ke kokarin karya lagon toshiyar da Israela ta yi wa al'ummar Gaza na Palasdinu.
  • Wadanda suka jikata
    Sojin Israela sun ce akalla masu fafutuka goma ne suka rasa rayukansu yayinda sojin kundunbala shida suka samu raunuka a lokacin da suka afka wa jiragen ruwan.
  • Jiragen Saman da aka yi amfani da su
    Sojojin Israela sun yi amfani da jiragen sama wajen yin dirar mikiya a kan jerin gwanon jiragen ruwan.
  • Mace dauke da gadon daukar marasa lafiya
    A nan za a iya ganin wata mace dauke da gadon daukara marasa lafiya da ya baci da jini a cikin jirgin ruwan.
  • Sojin Israela sun kama mai fafutuka
    Sojojin Israela sun ce masu fafutukar sun yi harbi suka kuma kai musu hari da wukake da gatari. Su kuwa masu fafutuka sun ce sojin Israelan sun bude wuta ne ba tare da an tsokane su ba.
  • Masu zanga zanga na kona tutar Israela
    Mutane da dama ne suka yi ta zanga zanga a sassa daban daban na duniya domin yin Allah wadai da matakin kisan da sojin Israela suka yi.
  • Sojin Israela na jan jiragen ruwan zuwa gaba
    Israela ta dauki matakin janye jiragen ruwan agajin zuwa gabar ruwanta na Ashdod, inda ta ce za ta tasa keyar mutanen dake ciki su bar yankin
  • Jiragen ruwan agaji
    Jiragen ruwan agajin sun bar gabar ruwan kasar Cyprus ne ranar Lahadi, kuma ana sa ran isarsu can ranar Litinin dauke da kayayyakin agaji da suka kai ton 10,000.

An dai gudanar da zanga zanga game da farmakin na Isra'ila a manyan biranen kasashen duniya.

A baya dai sojojin Isra'ila sun ce za su kai jirgin ne tashar jiragen ruwansu, inda za su sauke masu kare hakkin bil adaman da ke cikin sa don su koma da su gida.

Israi'la ta ce tana bari a shiga da kimamin tan dubu goma sha biyar na kayayyakin agajin zuwa yankin Gaza a duk mako.

Sai dai majalisar dinkin duniya ta ce wannan bai kai adadin da ake bukata ba.

BBC navigation

BBC © 2014 BBC ba ta da alhakin abubuwan da ke kunshe a shafukan da ba nata ba.

Wannan shafin zai fi kyan gani, idan an shige shi da browser mai salo na bai daya. Yayinda za ka iya samun damar duba abin da wannan shafin ya kunsa a browser da kake da ita a halin yanzu, ba za ka samu damar ganin dukkan abin da shafin ya kunsa kamar yadda ya kamata ba. Dubi yiwuwar inganta manhajar browsar ka, ko kuma ka samu browser mai salo na bai daya, idan har za ka iya.