An sabunta: 28 ga Mayu, 2011 - An wallafa a 07:32 GMT

Ba zan je rantsar da Jonathan ba -Buhari

Janar Muhammadu Buhari mai ritaya

Janar Muhammadu Buhari mai ritaya

A Najeriya, dan takarar shugabancin kasa na jam'iyyar CPC a zaben da ya gabata, Janar Muhammadu Buhari mai ritaya, ya ce ba zai halarci bikin rantsar da Shugaba Goodluck Jonathan ba ranar Lahadi.

A cewar Janar Buharin, a farkon makon da muke ciki ne dai gwamnatin—ta hannun ofishin da ke kula da harkokin tsofaffin shugabannin kasa a Ofishin Sakataren Gwamnatin Tarayya—ta gayyace shi wajen bikin rantsar da Dakta Jonathan a matsayin sabon shugaban kasar.

“An aiko min da katin [gayyata]…akwai kuma [lambar] waya ta ba da amsa; to na ce a ba da amsa cewa ba zan samu damar zuwa ba”, in ji Janar Buhari.

A hirarsa da wakilin BBC a Kaduna, Janar Buhari ya kuma kalubalanci wadanda suka sanya ido a zaben da ya gabata cewa su fito da shaidun da ke nuna cewa an gudanar da sahihin zabe a yankunan Kudu Maso Kudu, da Kudu Maso Gabashin kasar:

'Masu sa ido su fadi abin da ya faru'

“Wadanda suka je suka sa ido a kan zaben Kudu Maso Kudu da Kudu Maso Gabas da Kudu Maso Yamma su fadi abin da ya auku a can kudu—ko ko sa idon zaben na su a Arewa kawai aka sa su?”

Da ya ke mayar da martani a kan cewa jam’iyyar sa ta CPC ba ta yi aiki a sassan na kudancin Najeriya ba, kuma ba ta da magoya baya da yawa, Janar Buhari cewa ya yi:

“Akwai gaskiya cikin wannan magana; muna da magoya baya a Arewa fiye da Kudu—amma a Kudun ma muna da mutanen mu.

“Tunda wannan magana tana gaban shari’a, kuma mutanen mu na Kudu din wadanda aka kora, aka hana su su yi zabe; ko wadanda aka kashe su, ai an rubuta takardu wadanda za mu kai gaban shari’a saboda haka ba zan yi magana a kan wannan ba”.

BBC navigation

BBC © 2014 BBC ba ta da alhakin abubuwan da ke kunshe a shafukan da ba nata ba.

Wannan shafin zai fi kyan gani, idan an shige shi da browser mai salo na bai daya. Yayinda za ka iya samun damar duba abin da wannan shafin ya kunsa a browser da kake da ita a halin yanzu, ba za ka samu damar ganin dukkan abin da shafin ya kunsa kamar yadda ya kamata ba. Dubi yiwuwar inganta manhajar browsar ka, ko kuma ka samu browser mai salo na bai daya, idan har za ka iya.