BBC navigation

Syria: An amince da kafa gwamnatin wucin gadi —Annan

An sabunta: 30 ga Yuni, 2012 - An wallafa a 20:26 GMT
Kofi Annan da Sergei Lavrov

Kofi Annan yana kus-kus da Sergei Lavrov

Wakilin Majalisar Dinkin Duniya na musamman ga Syria, Kofi Annan, ya ce manyan kasashen duniya sun amince da wani shiri na kafa gwamnatin wucin-gadi wadda za ta samar da zaman lafiya a kasar ta Syria.

“Sun shaida min cewa suna goyon bayan shiri na na samar da zaman lafiya, kuma a watan Afrilu kansu ya hadu—lokacin da suka amince da wadansu kudurori guda biyu, amma ina kalubalantarsu su kara kaimi; ina ganin kuma mun dauki hanyar hakan”.

A cewar Amerika manufar shirin ita ce kafa gwamnatin da ba Shugaba Bashar al-Assad a cikinta, amma Rasha ta yi watsi da wannan ikirari, tana cewa ba a gindaya sharadi a kan wanda zai kasansce a cikin gwamnatin rikon kwaryar ba.

Wakilin BBC a wurin taron a Geneva y ace har yanzu akwai rarrabuwar kawuna a tsakanin manyan kasashen a kan matakan da ya kamata a dauka a kan Syria.

Ana ci gaba da zubar da jini

A halin da ake ciki kuma, masu fafutuka a kasar ta Syria sun ce sojojin gwamnati sun sake kwace garin Douma wanda ke kusa da babban birnin kasar, wato Damascus, bayan kwashe kwanaki ana yi masa kawanya da luguden wuta.

A cewarsu mutane da dama sun rasa rayukansu yayinda daruruwa suka jikkata, har ma ana ganin gawarwaki a kan titunan garin.

Masu fafutukar sun ce an tilastawa mutane da dama tserewa daga garin yayinda aka rutsa da wadansu—ga shi kuma abinci da ruwan sha sun tasamma karewa.

Kamfanin dillancin labarai na gwamnatin kasar ta Syria ya ce sojojin na ci gaba da fatattakar wadanda ya kira 'yan ta'adda a Douma.

Maudu'o'i masu alaka

BBC © 2014 BBC ba ta da alhakin abubuwan da ke kunshe a shafukan da ba nata ba.

Wannan shafin zai fi kyan gani, idan an shige shi da browser mai salo na bai daya. Yayinda za ka iya samun damar duba abin da wannan shafin ya kunsa a browser da kake da ita a halin yanzu, ba za ka samu damar ganin dukkan abin da shafin ya kunsa kamar yadda ya kamata ba. Dubi yiwuwar inganta manhajar browsar ka, ko kuma ka samu browser mai salo na bai daya, idan har za ka iya.