BBC navigation

Iran ta nuna goyon baya ga Al Assad

An sabunta: 7 ga Agusta, 2012 - An wallafa a 16:09 GMT

Shugaba Assad da Jalili

Gidan talabjin na kasar Syria ya ce babban jami'in gwamnatin Iran ya shaidawa shugaba Bashar al Assad cewa kasar Syriyar wata muhimmiyar bangare ce mai nuna turjiya kan abokan gaba, da Iran ba za ta bari ta fadi ba.

Wadannan bayanai dai na fitowa ne lokacin wata ganawa a birnin Damascus tsakanin shugaban Majalisar Tsaron kasar Iran, Saeed Jalili, da shugaba Assad, inda Mr Jalili ya ke cewa kasar Syria ce kawai zata iya magance matsalolinsu.

Kuma tuni mukaddashin ministan harkokin wajen Iran, Hoseyn Amir-Abdollahi ya ce an tura sako ga Amurka ta ofishin jakadancin kasar Switzerland a Tehran dangane da Iraniyawa 48 masu ziyarar Ibada din da aka yi awon gaba da su a Syria.

A cikin sakon Iran na cewa a sakamakon fitowa karara da Amurka ke yi tana mara baya ga kungiyoyin 'yan ta'adda , da tura makamai zuwa Syria, alhakin tsaron lafiyar Iraniyawa arba'in da takwas masu ziyarar Ibada a Damascus na wuyan Amurka.

Wasikar ta kuma kara da cewa , a matsayin Amurka na mai daukar nauyin ta'addanci rayukan Iraniyawan masu ziyarar Ibada na wuyanta.

Ita dai gwamnatin Iran na goyon bayan gwamnatin Assad, kuma tana adawa da duk wani sauyin gwamnati a Syria.

Hakan na faruwa ne kwana guda bayan da praministan kasar ta Syria ya sauya sheka zuwa bangaren 'yan tawayen.

Kari a kan wannan labari

Maudu'o'i masu alaka

BBC © 2014 BBC ba ta da alhakin abubuwan da ke kunshe a shafukan da ba nata ba.

Wannan shafin zai fi kyan gani, idan an shige shi da browser mai salo na bai daya. Yayinda za ka iya samun damar duba abin da wannan shafin ya kunsa a browser da kake da ita a halin yanzu, ba za ka samu damar ganin dukkan abin da shafin ya kunsa kamar yadda ya kamata ba. Dubi yiwuwar inganta manhajar browsar ka, ko kuma ka samu browser mai salo na bai daya, idan har za ka iya.