Kwamitin Tsaro zai gana kan harin makamai masu guba a Syria

wadanda harin makami masu ya shafa

Ana sa ran Kwamitin Tsaron Majalisar Dinkin Duniya zai gana in an jima kadan domin tattauna zarge-zargen da ake yi cewa dakarun Syria sun yi amfani da makamai masu guba a lokacin da suka yi lugudan wuta a wani yanki dake wajen babban birnin kasar Damascus.

'Yan adawar Syria sun ce an kashe daruruwan mutane a lugudan wutar, wanda gamayyar 'yan adawa a Syria ta bayyana da cewa kisan kiyashi ne.

Sai dai kuma gwamnatin Syrian ta musanta zargin da ake wa dakarun ta na amfani da makamai masu guba.

Wani likita a Syria, Ghazwan Bwidany ya bayyana cewa da sanyin safiyar yau ne suna bacci sojojin Assad suka harba rokoki shida a kan garuruwa uku da ke gabashin Ghouta.

Jim kadan bayan faruwar hakan, sai daruruwan mutane suka yi ta tururuwa zuwa cibiyoyin kula da marasa lafiya da alamar rauni a jikinsu.

An dai kai wannan hari ne a lokacin da wata tawaga ta duniya ta isa Syriar don binciken a kan wasu hare-haren makamai masu guba da aka kai a baya, da kuma binciken ko wane bangare ne ya kai harin.