An kashe mutane 42 a Gurmushi na Borno

Hakkin mallakar hoto AFP
Image caption Shugaban Boko Haram, Abubakar Shekau

Rahotanni daga garin Gurmushi da ke karamar hukumar Marte ta jihar Borno sun ce an kashe mutane akalla 42 a wani hari da 'yan bindiga suka kaddamar a ranar Laraba da safe.

'Yan bindigar -- wadanda ake zargin 'yan Boko Haram ne -- sun kuma raunata wasu mutane tare da kona daukacin gidajen garin.

Wata mata da ta tsira daga harin ta shaidawa BBC a harshen Kanuri cewa "Ina daga cikin wadanda suka tsira, an kona garin baki daya. Na ga gawarwaki 42".

A halin yanzu dai an garzaya da wasu daga cikin mutanen da suka samu raunuka zuwa wani gari da ke kan iyakar Nigeria da kasar Kamaru.

Wannan harin na zuwa ne a daidai lokacin da 'yan Boko Haram ke ci gaba da kaddamar da hare-hare a kan kauyukan da ke jihar Borno da Yobe.

A halin da ake a yanzu dai fiye da makonni shida kenan da 'yan Boko Haram suka sace 'yan mata fiye da 200 a wata makaranta da ke Chibok a jihar Borno.

Karin bayani