Najeriya za ta binciki boren sojoji

  • 19 Agusta 2014
Wasu sojojin Najeriya Image copyright Reuters
Image caption Wasu sojojin Najeriya

Rundunar sojin Najeriya ta ce za ta gudanar da bincike domin tantance gaskiyar boren sojoji a Maiduguri

Kakakin hedikwatar tsaro ta Najeriya Manjo Janar Chris Olukolade yace basu dauki wannan abu a matsayin bore ba har sai sun kammala bincike sun kuma tabbatar cewa hakan ne.

Olukolade yace bore ba karamin laifi ba ne a aikin soja, kuma bai kamata a yi gaggawar cewa wani mataki da wani soja ya dauka ya kai ga matsayin bore ba, domin kuwa mugun laifi ne, kuma idan ba'a an tabbatar da shi ba, ba za a yi shelar cewa bore ba ne.

Tun da farko a yau wasu sojojin da ke barikin Maimalari a Jihar Borno sun bujirewa umarnin tura su daji domin yaki da 'yan Boko Haram.

Sojojin wadanda yawan su ya haura talatin suka ja tunga da motocinsu a kan hanyar Maiduguri zuwa Bulabiri sun yi korafin cewa basu da isasun makamai da alburusai suna cewa ba za su yarda su yi mutuwar wulakanci domin ko da a ranar Litinin da ta wuce 'yan Boko Haram sun yiwa takwarorinsu kwantar bauna a kan hanya kuma basu da makamai da za su iya maida martani.

Daya daga cikin sojojin da suka yi boren wanda ya bukaci a sakaya sunansa ya shaidawa BBC cewa ba za su shiga dajin ba sai an basu isasun kayan aiki da makamai.

Karin bayani