An daidaita tsakanin Ali Nuhu da Adam Zango

Ali nuhu da Adam Zango
Image caption Ali nuhu da Adam Zango sun sasanta bayan shafe wata da watanni ba sa jituwa.

Jaruman fina-finan Hausan da suka fi shahara, Ali Nuhu da Adam A. Zango, sun daidaita bayan da suka kwashe wata da watanni ba sa jituwa.

Rashin jituwar dai ya faru ne a kan daya daga cikin jarumai mata, Rahma Sadau, kuma lamarin ya raba kawunan masu sana'ar ta fina-finan na Hausa.

Ranar Jumma'a wani malamin addinin Musulunci, kuma shugaban kungiyar masu sana'ar fina-finan Hausa, MOPPAN, Malam Khalid Musa, ya shiga tsakanin jaruman, yana mai yi musu wa'azi a kan muhimmancin zaman lafiya da kaunar juna.

Jaruman da wadansu jiga-jigai a harkar sun je wurin malamin ne, bayan da ya gayyace su.

Sulhun dai zai rage tsamar da aka samu a tsakanin masu harkar fina-finan Hausa, kasancewa Ali Nuhu da Adam A. Zango su suka fi yawan fitowa a fina-finan, kuma su ne suka fi yawan magoya baya.

Fina-finan na Hausa dai suna matukar kayatar da masu kallonsu, sannan dubban mutane ne ke cin abinci ta hanyar su, koda yake harkar na fuskantar kalubale da dama.