An kafa sabuwar dokar fyade a Kano

Image caption Gwamna Abdullahi Ganduje

Rahotanni daga jihar Kano na cewa bangaren shari'a na gwamnatin ya bullo da dokar da ta tanadi hukuncin daurin shekaru goma sha hudu a gidan yari, ba tare da zabin biyan diyya ba ga duk wanda aka samu da laifin aikata fyade.

An ambato babban sakataren ma'aikatar shari'a ta jihar Kano, Mukhtar Daneji na cewa, an tsaurara dokar ce saboda yadda fyade ke karuwa a jihar.

A baya dokar ta tanadi hukuncin daurin shekaru biyu ne ko kuma biyan tara.

Hajiya Attine Abdullahi, Shugabar kungiyar tallafawa Zawarawa da Marayu ta VOWAN, daya daga cikin kungiyoyin da ke fafutikar yaki da fyade a Kano ta nuna jin dadinta ga sabuwar dokar.

Cikin 'yan shekarun nan dai aikata fyade na karuwa a sassa da dama na Najeriya.