EFCC ta damke Godswill Akpabio

Hakkin mallakar hoto BBC World Service
Image caption Mr Akpabio ya jagoranci Akwa Ibom tsawon shekaru takwas

Hukumar yaki da cin hanci da rashawa a Nigeria, EFCC ta damke Mr Godswill Akpabio, tsohon gwamnan jihar Akwa Ibom kuma shugaban marasa rinjaye a majalisar dattawan kasar.

Bayanai sun ce da yammacin ranar Juma'a ne jami'an EFCC din suka damke tsohon gwamnan.

Ana zarginsa ne da wawure dukiyar al'umma a zamanin mulkinsa a jihar ta Akwa Ibom.

Wata majiya a hukumar EFCC ta tabbatar da cewa ana yi wa Mr Akpabio tambayoyi a ofishin hukumar da ke Abuja.

Sai dai kuma wasu rahotanni na cewa tun a daren ranar Juma'ar ne hukumar ta saki mista Akpabion ya koma zuwa gidansa.

Mr Godswill Akpabio shi ne gwamnan jihar Akwa Ibom daga shekarar 2007 zuwa 2015.

A yanzu haka dai EFCC na binciken wasu daga cikin tsofaffin gwamnoni a Nigeria ciki har da Alhaji Sule Lamido na Jigawa da Murtala Nyako na Adamawa da Gabriel Suswan na Benue da kuma Ikedi Ohakim na jihar Imo.