Ma'aikata sun yi zanga-zanga a Owerri

Image caption NLC na zargin cewa gwamnati ta dakatar tare da korar ma'aikatan ne ba bisa ka'ida ba.

Kungiyar kwadago ta NLC a Nigeria ta yi zanga-zanga a jihar Imo, lamarin da ya sa ayyuka suka tsaya cik a Owerri, babban birnin jihar.

Kungiyar ta yi boren ne domin nuna kin amincewa da korar wasu ma'aikata kimanin 500 da gwamnatin jihar ta yi.

A jawabin da ya yi ga taron ma'aikata, shugaban kungiyar NLC, Ayuba Wabba, ya ce za su rufe dukkan ofishin gwamnati da bankuna da gidajen mai saboda korar ma'aikatan.

NLC na zargin cewa gwamnati ta dakatar tare da korar ma'aikatan ne ba bisa ka'ida ba.

Sai dai gwamnati ta ce ta sallami ma'aikatan wasu hukumominta 19 ne da basu da amfani, wadanda kuma ta mika wa 'yan kasuwa domin su tafiyar da su, saboda haka akwai yiwuwar a maida ma'aikatan.