Beckham zai koma kulob din Faransa

  • 31 Janairu 2013
Tsohon kyaftin din Ingila David Beckham
Image caption Tsohon kyaftin din Ingila David Beckham

Ana sa ran daya daga cikin 'yan kwallon kafa da suka yi fice a duniya, kuma dan wasan Ingila David Beckham, zai koma kulob din Paris St German.

Dan wasan mai shekaru 37 a duniya ba shi da kulob tun da ya bar L-A Galaxy ta jihar California a bara.

Rahotanni daga kafafen yada labarai na cewa Beckham zai sanar da komawarsa kulob din, da zarar an kammala duba lafiyarsa.

Masu kudin Qatar ne suka zuba jari a kulob din na Paris St. German a shekarar 2011, kuma kulob din shi ne kan gaba a gasar cin kofin zakarun Faransa.

Beckham tsohon kyaftin din Ingila ya yi fice ne a lokacin da yake kulob din Manchester United, haka kuma yayi wasa a Real Madrid da Milan.