Za mu yi nazari a kan burinmu — Ingila

Image caption Ingila ta kasa taka rawar gani a gasar cin kofin nahiyar Turai da aka yi a Faransa

Shugaban hukumar kwallon kafa ta Ingila, Greg Clarke, ya ce za su sake yin nazari a kan burin da suke son ganin tawagar kwallon kafar yankin ta cimma.

Clarke ya fadi hakan ne a bikin kaddamar da shirin karbar bakuncin Gasar cin Kofin Nahiyar Turai ta shekarar 2020 a Landan.

Ya kara da cewa za su dora tawagar kwallon kafar ta Ingila a kan turba, ta yadda za ta dinga taka rawar gani a gasar wasanni.

Iceland ta kunyata Ingila a wasan zagaye na biyu a Gasar cin Kofin Nahiyar Turai da aka yi a Faransa.

A baya, hukumar kwallon kafa ta Ingila a karkashin jagorancin Greg Dyke ta sha alwashin lashe Gasar Kofin Nahiyar Turai ta 2020 da kuma Kofin Duniya na 2022.