Za a fara damben mota na Matasa a Minna

Damben gargajiya
Image caption Shu'aibu ya ce ya shirya wasannin ne domin a haskaka matasan 'yan dambe a duniya

An tsara fara wasan damben gargajiya na matasan 'yan wasa a Minna da ke jihar Niger a ranar Talata.

Tun farko an tsara fara gasar a ranar Litinin, amma ruwan sama da ya sauka a ranar ya sa aka dage wasannin.

Shugaban kungiyar dambe ta Niger, Shu'aibu Ado Soja, ya ce sun dauki matakan da suka da ce domin a yi wasannin lafiya.

Ya kuma ce sun shirya gasar ce domin raya al'adun gargajiya, da kuma fito da matasan 'yan dambe da suke yi wasannin.

A gasar da za a gudanar babu manyan 'yan wasa da suka hada da Ebola da Mai Takwasara da Ali Kanin Bello.

Za a yi kwanaki 10 ana gudanar da wasannin, kuma zakara zai lashe motar hawa, na biyu ya karbi babur, sannan a bai wa na uku kudi.

Ga wasanni shida da za a yi a rana ta farko:

  1. Autan Chika (Guramada ) da shagon Bata Isarka (Kudu)
  2. Shagon Karamutsa (Jamus) da Bahagon Dogon Auta (Kudu)
  3. Shagon Horon Kyande (Guramada) da Autan Fafa (Jamus)
  4. Dan Kirisfo (Jamus) da Shagon Dogon Auta (Kudu)
  5. Horon kyande (Guramada) da Shagon Shukurana (Jamus)
  6. Shagon Dogon Jamilu (Jamus) da Shagon Dogon Kyallu (Guramada)