Klose ya yi ritaya daga buga tamaula

Wold Cup Hakkin mallakar hoto Getty Images
Image caption Klose ya lashe kofin duniya a shekarar 2014 da aka yi a Brazil

Dan wasan tawagar kwallon kafa ta Jamus, Miroslav Klose, ya yi ritaya daga murza-leda.

Tsohon dan kwallon Bayern Munich, ya taimaka wa Jamus lashe gasar cin kofin duniya a 2014.

Kuma ya karbi kyautar wanda ya fi cin kwallaye a tarihin gasar gaba daya, bayan da ya zura kwallo 16 jumulla a wasannin da ya halarta na lokaci daban-daban.

Klose wanda ya ci kofuna biyu na gasar Bundesliga a Bayern Munich, ya zauna ba shi da kungiyar da yake buga tamaula, bayan da yarjejeniyarsa ta kare da Lazio a karshen kakar bara.

Dan wasan wanda aka haifa a Poland ya yi wa Jamus wasanni 137, inda ya shafe tarihin yawan cin kwallaye da Gerd Muller ya kafa tsawon shekara 40 da cin kwallaye 68 a Yunin 2014.

Klose ya yi ritaya daga buga wa Jamus tamaula bayan da aka kammala gasar cin kofin duniya a Brazil a shekarar 2014, ya kuma ci wa tawagar kwallaye 71.

Yanzu haka yana shirin komawa cikin kociyoyin tawagar kwallon kafa ta Jamus, bayan da Joachim Low ya mika masa goron gayyata.

Labarai masu alaka