Arsenal ta caskara West Ham da ci 5-1

Premier Hakkin mallakar hoto EPA
Image caption West Ham United ta koma mataki na 17 a kan teburin Premier da maki 12

Kungiyar Arsenal ta yi laga-laga da West Ham United inda ta doke ta da ci 5-1 a gasar Premier wasan mako na 14 da suka kara a ranar Asabar.

Arsenal ta ci kwallayenta ta hannun Mesut Ozil tun kafin a je hutu, bayan da aka dawo ne Alexis Sanchez ya ci uku rigis, sannan Oxlade-Chamberlain ya ci ta biyar a karawar.

Andy Carroll ne ya farke kwallo daya da West Ham ta ci a saura minti bakwai a tashi daga wasan na hamayya.

Da wannan sakamakon Arsenal wadda ta yi wasanni 14, ta dare mataki na biyu a kan teburi da maki 30, sai Liverpool ta uku wadda ta buga wasanni 13 da maki 30.