Liverpool ta tsira a hannun West Ham 2-2

Loris Karius ya kasa tare kwallon Dimitri Payet Hakkin mallakar hoto Reuters
Image caption Wannan shi ne karo na uku da Dimitri Payet yake cin kwallo kai tsaye da bugun tazara a gasar Premier League

Kwallayen da Dimitri Payet da Michail Antonio suka ci sun kara fito da raunin bayan Liverpool a fili, a wasan da suka tashi canjaras 2-2 da West Ham, wadda ta fito daga rukunin faduwa daga Premier, a Anfield

Bayan da Bournemouth ta zura mata kwallaye hudu a karshen makon da ya wuce, Liverpool ta yi sake 'yan wasan biyu suka jefa kwallo biyu a ragarta a zagayen farko na wasan, yayin da take ba wa Chelsea da Arsenal dama suke kara kankane teburin gasar ta Premier.

Adam Lallana ya fara ci wa Liverpool kwallo a minti biyar da fara wasa, amma kuma sai bakin suka rama ta hannun Payet a minti na 27 da bugun tazara wanda mai tsaron raga Loris Karius na Liverpool ya yi sake kwallon ta wuce.

Can kuma a minti na 39 sai Antonio ya sake daga ragar Liverpool, har aka tafi hutun rabin lokaci 2-1.

Bayan an dawo daga hutu ne sai Divock Origi, ya farke wa masu masaukin bakin Liverpool, wasa ya zama 2-2 kamar yadda aka tashi, wanda hakan ya sa West Ham ta samu maki dayan da ya sa ta fito daga rukunin faduwa daga gasar ta Premier, ta zama ta 17.