Mai kama da Messi ya shiga hannun 'yan sanda a Iran

Reza Parastesh da Lionel Messi Hakkin mallakar hoto Getty Images
Image caption (Daga hagu,) Reza Parastesh. (dama), Lionel Messi.

A karshen mako ne, aka samu wani rudani wanda har sai da 'yan sanda suka dauke wani dalibi dan kasar Iran suka kai shi ofishinsu saboda yana matukar kama da Lionel Messi

Mutane da yawa a birnin Hamaden na kasar ta Iran suna son daukar hoto da dalibin mai suna Reza Parastesh yayin da 'yan sanda suka kama motarsa domin dakatar da rudanin da hakan ya haddasa.

Lamarin ya faru ne, watanni kadan bayan da mahaifin Reza Parastesh ya sa dan nasa ya dauki hoto da rigar Barcelona mai lamba 10 irin ta Messi.

Daga nan sai matashin mai shekara 25 ya fara yin aski tare da barin gemunsa kamar yadda Messi yake yi.

Hakkin mallakar hoto Getty Images
Image caption Ana rokon Parastesh yin hotuna a birnin Hameden, na kasar Iran

Ya fada wa kamfanin dillancin labarai na AFP cewa "Yanzu mutane suna daukarsa a matsayin Messi na Iran, kuma suna so in rika kwaikwayon duk abin da yake yi. Idan na je wani wurin sai ka ga mutane suna matukar mamaki.

" Ina matukar murna ganin cewa ganina zai sanya wasu farin ciki, kuma wannan farin ciki yakan sa ni farin ciki sosai."

Ya kuma ce yana koyon yadda ake wasu abubuwan a wasan kwallon kafa ta yadda zai zama kamar Messin sosai.

Labarai masu alaka