Madrid za ta sayi Mbappe mafi tsada a duniya

Monaco Hakkin mallakar hoto Getty Images
Image caption Monaco ta yi zargin cewar ana tuntubar Mbappe ba tare da izininta ba

Real Madrid ta shirya sayen Kylian Mbappe kan kudi Yuro miliyan 180 daga Monaco a bana in ji jaridar Marca.

A labarin da ta wallafa ta ce wannan kudin da Madrid za ta biya Monaco zai haura wanda Manchester United ta sayi Paul Pogba daga Juventus a 2016.

Madrid din za ta fara biyan Monaco Yuro miliyan 160 daga baya ta karasa biyan Yuro miliyan 20 da sauran tsarabe-tsaraben da zai saka hannu kan yarjejeniya.

Jaridar ta ce da PSG ta dauki Neymar kan Yuro miliyan 222 daga Barcelona wanda ya ce zai ci gaba da zama a Nou Camp, da shi ne zai zama mafi tsada a banar.

Wannan kuma ba shi ne karon farko da Real Madrid ke sayan 'yan kwallo mafi tsada a duniya ba.