30-апрель аза күтүү күнү деп жарыяланды

Көчкү алдында калгандардын көпчүлүгү жаш балдар. Алардын сөөгүн алып чыгуу иштери уланып жатат. Сүрөттүн автордук укугу official
Image caption 29-апрелде Оштун Өзгөн районундагы Зергер айыл аймагынын Аюу айылында эрте менен болгон жер көчкү кырсыгы жети турак үйдү басып калган. Өлкөнүн Өзгөчө кырдаалдар министрлиги 24 киши көчкү алдында калганын маалымады.

Кыргызстандын Ѳзгөн аймагындагы 24 адамдын өмүрүн алган жер көчкү кырсыгына байланыштуу өлкө Президенти Алмазбек Атамбаев "2017-жылдын 30-апрелин Кыргыз Республикасында аза күтүү күнү деп жарыялоо жөнүндө" жарлыкка кол койду. Бул тууралуу Президенттин басма сөз кызматы кабарлады.

«2017-жылдын 29-апрелинде Ош облусунун Өзгөн районундагы Зергер айылдык аймагынын Аюу айылында адам курмандыктарына алып келген жер көчкү болду. Кырсык биздин жарандардын өмүрүн кыйды. Кыргызстандын бүткүл калкы үчүн бул оор жоготуу. Кыргыз Республикасынын мамлекеттик органдары жабыркагандарды жана каза болгондордун сөөгүн издөө боюнча куткаруу иштерин жүргүзүүдө, алардын бир туугандарына жана жакындарына колдоо көрсөтүү боюнча чаралар көрүлүп жатат.

Каза болгондорго терең кайгыруу жана алардын бир туугандарына жана жакындарына көңүл айтуу менен токтом кылынат:

1.2017-жылдын 30-апрели Кыргыз Республикасында аза күтүү күнү деп жарыялансын.

2. Аза күтүү күнү Кыргыз Республикасынын бүткүл аймагында, ошондой эле чет өлкөлөрдөгү дипломатиялык жана консулдук өкүлчүлүктөрдүн имараттарында Кыргыз Республикасынын мамлекеттик желектери түшүрүлсүн.

3. Кыргыз Республикасынын маданий мекемелерине жана телерадиокомпанияларына аза күтүү күнү оюн-зоок иш-чараларды жана берүүлөрдү токтотуу сунушталсын.

4. Кыргыз Республикасынын Өкмөтү жергиликтүү өз алдынча башкаруу органдары менен бирдикте каза болгондордун үй-бүлөлөрүнө зарыл жардам жана колдоо көрсөтсүн. Жарлык кол коюлган күндөн тартып күчүнө кирет»,-деп айтылат Президенттин расмий сайтына жарыяланган маалыматта.

29-апрелде Оштун Өзгөн районундагы Зергер айыл аймагынын Аюу айылында эрте менен болгон жер көчкү кырсыгы жети турак үйдү басып калган. Өлкөнүн Өзгөчө кырдаалдар министрлиги 24 киши көчкү алдында калганын маалымдады.

Көчкү алдында калгандардын көпчүлүгү жаш балдар. Алардын сөөгүн алып чыгуу иштери уланып жатат.