लण्डन हमलाको विश्व नेताहरुद्वारा निन्दा

  • 23 मार्च 2017
लण्डन हमला तस्वीर कपीराइट Reuters

लण्डनमा भएको आतंकवादी हमलाको निन्दा गर्दै विश्व नेताहरुले ब्रिटेनसंग ऐक्यबद्धता जनाएका छन्।

मध्ये लण्डनस्थित ब्रिटिश संसद भवन नेर मा बुधबार भएको आतंकवादी हमलामा परी एक प्रहरी र एक हमलाकारी सहित कूल पाँच जनाको ज्यान गएको छ।

उक्त घटनामा ४० जना घाइते भएका छन्।

समवेदना

एकजना हमलाकारीले आफु चढेको कार पदयात्रीहरु भएतिर जोत्दा वेष्टमिन्सटर पुलमा तीन जना मारिएका थिए।

त्यसपछि ती हमलाकारीले संसद बाहिर एक प्रहरीलाई छुरा प्रहार गरे र लगत्तै ती हमलाकारीलाई गोली हानिएको थियो।

गत वर्ष गाडी जोताएर गरिएका घातक हमला बेहोरेका फ्रान्स तथा जर्मनीका नेताहरुले ब्रिटेनप्रति समर्थन जनाएका छन्।

फ्रान्सका राष्ट्रपति फ्राँस्वाँ ओलाँदले ब्रिटिश जनताले जे बेहोरेका छन् त्यो फ्रान्सले महशुश गर्न सक्ने बताए।

तस्वीर कपीराइट AP

उनले भने, "हामी फ्रान्सको तर्फबाट ब्रिटेनलाई सम्पूर्ण साथ र समर्थन प्रकट गर्दछौं।"

गत वर्षको जुलाईमा एक पुरुषले लरी जोत्दा फ्रान्सको शहर नीसमा ८४ जनाको ज्यान गएको थियो।

लरीबाटै गरिएको हमलामा डिसेम्बरमा जर्मन शहर बर्लिनमा १२ जना मारिएका थिए।

जर्मन चान्सलर एंगेला मर्कलले ब्रिटिश जनताप्रति समवेदना प्रकट गरेकी छन्।

त्यस्तै अमेरिकी राष्ट्रपतिले समवेदना प्रकट गर्दै ब्रिटिश सुरक्षा फौजको प्रशंसा गरेका छन्।

दोषी को?

सो घटना स्थानीय समय अनुसार बुधबार अपरान्ह पौने तीन तिर भएको थियो।

एकजना प्रत्यक्षदर्शीले घटनाबारे सुनाउँदै भने, "म ट्राफिक लाइट हरियो हुने पर्खाइमा थिएं। त्यतिनै खेर एउटा कार वेगले गुड्दै गयो। एउटा सानो पसलमा पहिले त्यसले हिर्कायो। मैले त्यति धेरै ध्यान दिएको थिइन तर त्यसपछि लगालग त्यसले हान्दै गएपछि मलाई गडबडी भएको लाग्यो। सडक छेउमा थुप्रै मानिस भएतिर त्यो गाडी सोझिएको थियो।"

प्रहरीले उक्त हमलासंग इसलामवादीसंग सम्बन्धित हुन सक्ने जनाएको छ।

मेट्रोपोलिटन प्रहरीका वरिष्ठ प्रति आतंकवाद अधिकारी मार्क रावले ले आफुहरुलाई हमलाकारीको परिचय थाहा भइसकेको विश्वास व्यक्त गरे तर थप विवरण दिएनन्।

ब्रिटिश प्रधानमन्त्री टरिजा मे ले घटनाको निन्दा गरेकी छन्।

डाउनीङ्ग स्ट्रीटमा मन्त्रीहरुसंगको आपतकालीन बैठकपछि बोल्दै उनले घाइते तथा सुरक्षाकर्मीहरुप्रति सम्मान प्रकट गरिन्।

उनले भनिन्, "यस घटनाबाट प्रभावित सबैलाई हामीले सम्झिराखेका छौं। घाइते हरु अनि तिनका परिवार र मित्र जसले आफ्ना प्रियजन गुमाए। साथै यो घटनाका बेला संसदमा रहेका हामी सबैलाई यतिखेर सुरक्षाकर्मीका असाधारण वीरता फेरि स्मरण भएको छ। जसले आफ्नो ज्यान जोखिममा पारी हामीलाई सुरक्षित राखे।"