तालेबान हमलामा दर्जनौँ अफगान सैनिकको मृत्यु

  • 22 एप्रिल 2017
अफगानिस्तान तस्वीर कपीराइट AFP

अफगानिस्तानका अधिकारीहरुले अफगान सैनिकको भेषमा आएको तालिबान बन्धुकधारीहरुले उत्तरी शहर मजार-ए-शरिफमा ७० भन्दा बढी सैनिकलाई मारिदिएको बताएका छन्।

सैनिक प्रवक्ता नस्रतउल्लाह जम्सिदीले विद्रोहीहरुले एउटा सैन्य अखडामा रहेको मस्जिदमा शुक्रबारको साप्ताहिक प्रार्थना सकेर फर्किरहेका फौजीहरुमाथि त्यस्तो हमला गरेको जनाए।

चमेना गृहमा नास्ता गरिरहेका अन्य सैनिकहरुलाई पनि निशाना बनाइएको थियो।

तालेबानले आफ्ना आक्रमणकारीले विस्फोन गराएको र आत्मघाति हमलाकारीले उक्त सैन्य शिविरको सुरक्षा घेरा तोडेको बताएको छ।

संख्या

राति अबेरसम्म लडाइँ चलिरहेको थियो र अधिकारीहरुले मृतकको संख्या बढ्न सक्ने जनाएका छन्।

तस्वीर कपीराइट Reuters

उक्त आक्रमणका कम्तीमा १० जना तालेबान उग्रवादीहरु मारिएका छन्।

एकजना सैनिक कमाण्डरले एफएपी समाचार संस्थासँग कुरा गर्दै शुक्रबार अबेरसम्म गोली हानाहानको आवाज सुनिएको र कम्तीमा एकजना हमलाकारीले आफैंलाई विस्फोट गराएको जनाएका छन्।

अमेरिकी सेनाका प्रवक्ता जन टमसले रोएटर्स समाचार संस्थासँग कुरा गर्दै शुक्रबारको आक्रमण एउटा ठूलो हमला भएको बताए।

मजार-ए-शरिफमा रहेको सैन्य अखडा अफगान राष्ट्रिय सेनाको २०९ औँ पल्टन बस्ने गरेको छ।

सुरक्षा

उक्त फौजले हालैका समयमा भीषण लडाइँहरु बेहोरेको उत्तरी अफगानिस्तानको कुन्दुज लगायतका क्षेत्रमा सुरक्षा उपलब्ध गराउने जिम्मेवारी पाएको छ।

अफ्गानिस्तानको पश्चिमा समर्थन प्राप्त सरकारले तालेबान र अरु विद्रोही समूहसँग लामो सयमदेखि लडाइँ गरिरहेको छ।

अघिल्लो महिना इस्लामिक स्टेट समूहका उग्रवादीहरुले गरेको ठानिएको एउटा हमलामा काबुलमा कम्तीमा ५० जनाले ज्यान गुमाएका थिए।

गएको मार्चमा तालेबानहरुले दक्षिण अफगानिस्तानको एउटा महत्वपूर्ण जिल्ला आफ्नो कब्जामा लिएको घोषणा गरेका थिए।