लण्डन आगलागीमा मारिनेको संख्या १२

  • 15 जुन 2017
लण्डनको एक भवनमा आगलागी तस्वीर कपीराइट Getty Images

पश्चिमी लण्डनको एक बहुतले भवनमा लागेको आगोमा परि मारिनेको संख्या १२ पुगेको छ।

प्रहरीले अझै त्यो संख्या बढ्न सक्ने बताएको छ।

सत्तरीभन्दा धेरै घाइतेहरुको अस्पतालमा उपचार भइरहेको छ।

तीमध्ये १८ जना गम्भीर अवस्थामा छन्।

उत्तरी केन्जींगटनको ग्रेनफेल टावरबाट अग्नि नियन्त्रकहरुले ६५ जनाको उद्धार गरेका छन्।

प्रत्यक्षदर्शीहरुले मानिसहरु त्यहाँ फसिरहेको र कतिपयले ज्यान जोगाउने प्रयासमा झ्यालबाट हाम फालेको बताएका छन्।

पाठ

प्रधानमन्त्री टरिजा मे ले उक्त आगलागीबारे पूर्ण छानविन हुने र कुनै पाठ सिक्नुपर्ने देखियो भने त्यो सिकिने बताएकी छन्।

आधा रातमा आगलागी हुँदा उक्त भवनमा सयौं मानिस रहेको हुन सक्ने बताइन्छ।

लण्डन आगलागीमा ६ जनाको मृत्यु भएको पुष्टि

चौबिस तले सो भवनमा १२७ वटा फ्ल्याट थिए।

सन् २०१६ मा त्यहाँ मर्मत सम्भार गरिएको थियो।

सो घटनापश्चात ब्रिटेनमा अब हालै मर्मत सम्भार भएका त्यस्ता भवनहरुमा सुरक्षा जाँच गरिने भएको छ।

उक्त आगलागीबाट बच्न सफल कतिपयले भवनको बाहिरी संरचना वरपर लगाइएको क्ल्याडिङ्गका कारण आगो चाँडो फैलिएको हुन सक्ने बताएका छन्।