केन्यामा उहुरु केन्याटा पुन: राष्ट्रपति

  • 12 अगस्ट 2017
पुन निर्वाचित
Image caption राष्ट्रपतिमा पुन: निर्वाचित भएपछि बोल्दै उहुरु केन्याटा

केन्याका राष्ट्रपति उहुरु केन्याटा मंगलबारको निर्वाचनपछि पुन: राष्ट्रपतिमा निर्वाचित भएको अधिकारीहरुले बताएका छन्।

सन २०१३देखि राष्ट्रपति रहेका केन्याटाले ५४.३ प्रतिशत मत प्राप्त गरेका छन् भने उनका प्रतिस्पर्धी रायला ओडिङ्गाले ४४.७ प्रतिशत।

चुनाव परिणाम घोषणापछि केन्याटाले एकताका लागि आह्वान गर्दै विपक्षी समर्थकहरुलाई भने, "म तिमीहरुसँगै छु....हामी एउटै गणतन्त्रका नागरिक हौं।"

विपक्षीले परिणाम घोषणा हुनु अघि अस्वीकार गरिसकेको थियो।

अनुमोदन

तर अन्तर्राष्ट्रिय पर्यवेक्षकहरुले परिणाम अनुमोदन गरेका छन्।

केन्याटाले स्वतन्त्र, निष्पक्ष र विश्वासिलो रुपमा चुनाव गराइएको बताएका छन्।

तस्वीर कपीराइट Reuters
Image caption केन्याटाका समर्थकहरु सडकमा खुशी मनाउँदै

विपक्षी बहुल किसुमु शहर र राजधानी नाइरोबीका किबेरा लगायतका झुपडबस्ती क्षेत्रहरुमा विरोध प्रदर्शन भएका छन्।

कैयौं ठाउँमा प्रहरीले प्रदर्शनकारीमाथि अश्रृ ग्यास प्रहार गरेको बताइएको छ।

त्यहाँ रहेका बीबीसी संवाददाताले गोलीको आवाजपनि सुनिएको बताएका छन्।

त्रास

कैयौं पर्यवेक्षकहरुले दश वर्ष अघिको विवादास्पद चुनावपछिको हिंसा दोहोरिने हो कि भनेर त्रास व्यक्त गरेका छन्।

त्यसबेला १,१०० भन्दा बढि केन्यालीहरुको ज्यान गएको थियो र ६ लाख विस्थापित भएका थिए।

केन्याटाले शान्तिका लागि आग्रह गरेका छन्।

यो चुनाव सन १९६३ मा केन्या स्वतन्त्र हुने बेलादेखिको केन्याटा र ओडिङ्गा परिवारबीचको राजनीतिक प्रतिस्पर्धा पनि थियो।

फेरि एकपटक केन्याटा समूहले जितेको छ।