टेक्ससमा भीषण बाढीको चेतावनी

  • 27 अगस्ट 2017
आँधी तस्वीर कपीराइट AFP

अमेरिकाको टेक्सस राज्यका गभर्नर ग्रेग एबटले हार्वी नामक समुद्री आँधीले निम्त्याउने विध्वंशभन्दा पनि आँधीसँगै भइरहेको वर्षाका कारण नाटकीय ढंगले आउनसक्ने बाढी आफ्नो प्रमुख चिन्ताको विषय भएको बताएका छन्।

आँधीको मार्गमा रहेका दुई शहरहरु ह्युस्टन र कर्पस क्रिस्टीमा कम्तीमा ५० सेन्टिमिटर पानी परिसकेको भन्दै उनले साताको मध्यसम्म आँधी नियन्त्रणमा आउनुअघि थप एक मिटर वर्षा हुने अपेक्षा गरिएको बताए।

भीषण आँधीका कारण उद्धार प्रयासहरु प्रभावित भएका छन् र लाखौँ मानिसहरु बिजुली विना बसिरहेका छन्।

हालसम्म रकपोर्ट नगरमा एकजनाको मृत्यु भएको पुष्टि भएको छ।

शक्तिशाली

अमेरिकी मूलभूमिमा १२ वर्षयता आएको शक्तिशाली आँधी भनिएको हार्वीलाई 'क्याटेगोरी फोर'मा राखिएको थियो।

तर अहिले आँधीको शक्ति कम हुँदै गएको बताइएको छ।

अधिकारीहरुले भत्किएका घरमा केही मानिसहरु फसेको हुनसक्ने बताएका छन् र व्यापक रुपमा विद्युत् आपूर्ति बन्द भएको जानकारी दिएका छन्।

तस्वीर कपीराइट AFP

अझै केही दिन पानी पर्ने ठानिएको छ।

घरमा आगो लाग्दा एकजनाले रकपोर्ट शहरमा ज्यान गुमाएका छन्।

प्रभावित

टेक्ससको मध्य तथा माथिल्लो क्षेत्रमा १ मिटरभन्दा बढ्ता पानी पर्ने अमेरिकी आँधी केन्द्रको भनाई छ।

तस्वीर कपीराइट REUTERS

उसले कतिपय तटीय क्षेत्रमा बाढी आउने उल्लेख गरेको छ।

कोर्पस क्रिस्टीबाट शुक्रबार शुरु हुँदा हार्वीको वेग २१५ किलोमिटर प्रतिघण्टा रहेको थियो तर पछि त्यसको वेग घटेर ७० मिटर प्रतिघण्टामा झरेको थियो।

विद्युत् सेवा प्रदायकहरुले करिब ३ लाख मानिसहरु बिजुली बिना बसिरहेको जनाएका छन्।

अमेरिकी राष्ट्रपति डोनल्ड ट्रम्पले आँधीमा फसिरहेका मानिसहरुको उद्धारलाई उच्च प्राथमिकतामा राख्न निर्देशन दिंदै विपद् प्रभावित क्षेत्रमा संघीय सहायता पुर्‍याउन भनेका छन्।