समायोजनसंबन्धी विवाद टुंग्याउन प्रधानमन्त्रीद्वारा थप समय माग

पछिल्लोपल्ट अपडेट गरिएको: 08.04.12, 20:54 NST सम्मका समाचार
maoist combatants

मापदण्डमा पास हुने लडाकुलाई मात्र समायोजनमा पठाउने भन्दै माओवादीले आन्तरिक गृहकार्य थालेको छ

प्रधानमन्त्री बाबुराम भट्टराईले सेना समायोजन विशेष समितिको बैठकमा लडाकु समायोजन प्रक्रियालाई सहज बनाउन माओवादी कमाण्डरहरूसँग परामर्श आवश्यक रहेको भन्दै थप समय मागेका छन्।

समायोजन मापदण्ड पुरा गर्नेहरुको संख्या आन्तरिक रुपमा तय गर्न भन्दै माओवादी कमाण्डरहरुलाई काठमाडौ निम्त्याइएको बताइएको छ।

प्रधानमन्त्रीको भनाइमा आश्वस्त देखिएका विशेष समिति सदस्य भीम रावलले भने, "समायोजनलाई सहज बनाउनका लागि कमाण्डरहरुसँग बैठक डाकिएको हो, शंका नगरौं भनेपछि हामीले हुन्छ भन्यौ।"

परामर्श

आन्तरिक तयारीकै क्रममा एकीकृत माओवादीको स्थायी समितिको आइतबारको बैठकमा अध्यक्ष पुष्पकमल दाहाल प्रचण्डले सैन्य कमाण्डरहरुसँग परामर्श गरेका थिए।

बैठकमा सहभागी माओवादी सैन्य कमाण्डर नन्द किशोर पुनले भने,"शिविरहरुमा गृहकार्य भइरहेको छ। त्यहाँको सकिने बित्तिकै सबै कमाण्डरहरुसँग बस्छौं र सबै कुरा मिलाउँछौं।"

उनका अनुसार सोमबार र मंगलबार कमाण्डरहरु सहितको बैठकले नै कति माओवादी समायोजनमा पठाउने भन्ने तय गर्नेछ।

गृहकार्य

"शिविरहरुमा गृहकार्य भइरहेको छ। त्यहाँको सकिने वित्तिकै सबै कमाण्डरहरुसँग बस्छौं र सबै कुरा मिलाउँछौं"

नन्दकिशोर पुन, माओवादी सैन्य कमाण्डर

शिविरहरुमा कमाण्डरहरुले समायोजन मापदण्डमा पर्नेलाई मात्र पठाउने गरी गृहकार्य तीब्र पारेको बताइएको छ।

त्यसै कारण आइतबारदेखि समायोजनमा जाने संख्या घटाउन शुरु गर्ने भनिएको पुनर्वर्गीकरणको काम हुन सकेन।

इलामस्थित चुलाचु्ली शिविर पुगेका विशेष समिति अन्तर्गतको सचिवालयका एकजना सदस्य डा शंभुराम सिंखडाले भने, "कमाण्डरहरुसँग बैठक डाकेको तर संभव हुन नसके पछि आज काम शुरु हुन सकेन।"

विशेष समिति सदस्य रावलका अनुसार उनीहरु अझ पनि चैत मसान्तभित्रै समायोजनको मुख्य काम पुरा हुने अपेक्षामा छन्।

दलहरुबीच महानिर्देशनालयको छनौट, छनौट समिति, दर्जा निर्धारण लगायतका विषयमा सहमति हुन बाँकी छ।

BBC © 2014 बाहिरी वेबसाइटको सामग्रीका लागि बीबीसी जिम्मेवार छैन।

यो पृष्ठ स्टाइल शीटहरू (CSS) सकृय तुल्याइएको अप टु डेट ब्राउजरमा राम्ररी हेर्न सकिन्छ। यो पेजको सामग्री तपाईं अहिलेको ब्राउजरमा हेर्न त सक्नुहुन्छ तर सम्पूर्ण सेवाहरूको उपयोग भने गर्न सक्नुहुन्न। कृपया आफ्नो ब्राउजर अपग्रेड गर्नुहोस् अथवा सकिन्छ भने स्टाइल शीटहरू (CSS) लाई सकृय तुल्याउनुहोस्।