अर्का जापानी बन्धकको हत्या: आईएस

  • 1 फेब्रुअरी 2015
तस्वीर कपीराइट AFP
Image caption आईएसले गोटोको रिहाईका निम्ति २० करोड डलर फिरौती मागेको थियो

हत्या गर्ने चेतावनी दिदै आएको इस्लामिक स्टेट लडाकु समूहले सिरियाबाट अपहरित जापानी नागरिक केन्जी गोटोको शिर छेदन गरिएको देखिने एउटा भिडिओ सार्वजनिक गरेको छ।

अर्का जापानी नागरिक हारुन युकावाको शिर छेदन गरिएको समाचार आएको एक साताभन्दा पनि कम समयमा उक्त भिडिओ बाहिर आएको हो।

फिल्म निर्माताको समेत परिचय बनाएका ४७ वर्षीय स्वतन्त्र पत्रकार गोटो अपहरित युकावाको रिहाइको प्रयास गर्न भनि गत अक्टोबरमा सिरिया गएका थिए।

जापानले उक्त भिडिओको आधिकारिकता जाँच्ने काम भईरहेको जनाएको छ।

स्तब्ध

पछिल्लो भिडिओमा पनि अघिल्लोमा जस्तै ब्रिटिस शैलीको उच्चारण भएका एकजना लडाकूले गोटोको घाँटी काटेको देखाईएको छ।

जापान सरकारका प्रवक्ताले उक्त भिडिओले आफूहरुलाई स्तब्ध बनाएको उल्लेख गर्दै त्यसबारे प्रतिक्रियाको निम्ति मन्त्रिपरिषद्को बैठक बसिरहेको जानकारी दिए।

प्रधानमन्त्री शिन्जो आबेले भने, “जापान आतंकवादसँग हार मान्ने छैन्।”

केन्जी गोटोको भएको भनिएको हत्याका जिम्मेवारहरुलाई न्यायको कठघरामा ल्याउन जापानले अन्तर्राष्ट्रिय समुदायसँगै काम गर्ने उनले बताए।

गोटोका भाई जुनिचिले जापानी टेलिभिजन एनएचकेसँग भने, “केन्जीले आफूलाई साथ दिनेहरुलाई धन्यवाद दिन उनी जीवित फर्किने आशा गरेको थिएँ, तर म गम्भीर शोकले भरिएको छु, उनले त्यसो गर्न सकेनन्।”

अमेरिकी राष्ट्रपति बराक ओबामाले एउटा वक्तव्य जारी गर्दै भनेका छन्, “गोटोको घृणित हत्याको अमेरिका निन्दा गर्दछ।”

गोटोको भएको भनिएको हत्याको ब्रिटेन र फ्रान्सले पनि भर्त्सना गरेका छन्।

तस्वीर कपीराइट
Image caption अर्का नागरिकको हत्याबाट प्रधानमन्त्री शिन्जो आबे क्रुद्ध बनेको बताईएको छ

ब्रिटिस प्रधानमन्त्री डेभिड क्यामरनले आईएसलाई ‘मानवीय जीवनप्रति कुनै सरोकार नभएको पापको अवतार’ को संज्ञा दिएका छन्।

सकुशल

जापानका अधिकारीहरुले जोर्डनको सहयोगमा गोटो र गत डिसेम्बरमा सिरियामा गोली प्रहार गरिएका जोर्डनी विमान चालक मुआध अल कसास्बाको सकुशल रिहाईको निम्ति प्रयास गरिरहेका थिए।

तर आईतबार सबेरै उनीहरुले कुराकानी अवरुद्ध भएको बताएका थिए।

आईएसले मंगलबार जारी गरेको भिडिओमा गोटोको जीवन २४ घण्टामात्र र कसास्बाको झन् कम बाँकी रहेको बताईएको थियो।

पछि आईएसले गोटोलाई मुक्त गर्नका निम्ति बहिबारको सूर्यास्तसम्ममा जोर्डनद्वारा इराकी लडाकू साजिदा अल रिशावी रिहा गरिनुपर्ने समयसीमा दिएको थियो।

तर पाइलट कसास्बा पनि मुक्त गरिनुपर्ने जोर्डनको मागका कारण वार्ता जटिल बनेको हुनसक्छ।

आफ्नो छोराको रिहाइको निम्ति सार्वजनिक आग्रह गरेकी गोटोकी आमासँग लडाकूहरुले इमेल आदानप्रदान गरेको पनि देखिएको छ।

शुरुमा आईएसले दुईजना जापानी नागरिकको रिहाइको निम्ति २० करोड डलर फिरौती माग गरेका थिए।