‘बन्दुकधारीद्वारा ओरेगनमा १० जनाको हत्या’

  • 2 अक्टोबर 2015
तस्वीर कपीराइट AP
Image caption बन्दुकधारीले क्याम्पसमा आक्रमण गर्नुको कारणबारे अनु्सन्धान गरिरहेको प्रहरीले जनाएको छ

अमेरिकाको ओरेगन राज्यको ग्रामीण क्षेत्रमा रहेको एउटा क्याम्पसमा एकजना बन्दुकधारीले गोली चलाउँदा कम्तीमा १० जना मारिएको प्रहरीले बताएको छ।

युम्पकुवा कम्युनिटि कलेजमा २६ वर्षीय बन्दुकधारीले गरेको उक्त आक्रमणमा अन्य ७ जना घाइते भएका छन्।

प्रहरीसँग गोली हानाहान हुँदा बन्दुकधारी पनि मारिएका छन्।

ओरेगनका महान्यायाधिवक्ताले १३ जनाको मृत्यु भएको बताएपनि प्रहरीले मृत्यु हुनेको संख्या ७ देखि १० को बीचमा रहेको जनाएको छ।

नियमित

निराश देखिएका राष्ट्रपति बराक ओबामाले बन्दुक नियन्त्रणसम्बन्धी कडा कानुन ल्याउनुपर्नेमा जोड दिए।

ओबामाले ‘प्रार्थना मात्र पर्याप्त’ नभएको बताए।

त्यस्ता गोलीकाण्ड र त्यसप्रतिको आफ्नै प्रतिक्रिया नियमित जस्तो भएको भन्दै उनले निराशालाई लुकाउन नसकेको उल्लेख गरे।

ओबामाले भने, “यो पृथ्वीमा हाम्रो मात्र देश होइन, जहाँ मानसिक रोगी वा एकअर्कालाई हानी पुर्याउने मानिसहरु बस्छन् तर हरेक केही महिनाभित्र धेरैजनाको ज्यान जानेगरी गोलीकाण्ड हुने देश हाम्रो मात्र हो।”

धम्की

बन्दुक नियन्त्रणबारे बीबीसीलाई आफूले दिएको एउटा अन्तरवार्तालाई उद्धृत गर्दै ओबामाले ब्रिटेन र अष्ट्रेलिया जस्ता मुलुकले त्यसबारे प्रभावकारी कानुन सम्भव भएको प्रमाणित गरिसकेको बताए।

क्याम्पसमा ती बन्दुकधारीले गोली चलाउनुको कारण थाहा हुन सकेको छैन तर उनले सामाजिक सञ्जालमार्फत त्यस्तो गर्न सक्ने धम्की दिएकोबारे अनुसन्धान गरिरहेको प्रहरीले जनाएको छ।

उक्त क्याम्पसको विपरीत दिशामा रहेको एउटा घरमा बस्ने लोरी एन्ड्रिव्जले पटाका पड्केको जस्तो आवाज सुनेको र बाहिर निस्किंदा विद्यार्थीहरु चिच्याउँदै भागिरहेको आफूले देखेको बताइन।