ठूला व्यक्तिहरु संलग्न कर छलीबारे खुलासा

  • 4 एप्रिल 2016
तस्वीर कपीराइट AFP

गोप्य दस्तावेजको एउटा ठूलो चुहावटले शक्तिशाली व्यक्तिहरुले कसरी कर छली गरी आफ्नो सम्पति लुकाउँछन् भन्ने खुलासा गरेको छ।

प्यानमाको एउटा अति गोप्य कानुनी फर्म मोस्याक फोन्सेकाका झण्डै १ करोड १० लाख दस्तावेज सार्वजनिक भएपछि यी जानकारी सतहमा आएका हुन्।

उक्त ल फर्मले कालो धनलाई सेतो बनाउन, कर र विभिन्न प्रतिबन्धहरु छल्न आफ्ना सेवाग्राहीलाई सहयोग गरेको पाइएको छ।

गोप्य दस्तावेजमा बहालवाला वा पूर्व गरी ७२ जना राष्ट्रप्रमुख संलग्न भएको देखिन्छ, जसमध्ये कतिपय तानाशाहलाई आफ्नो देशको स्रोत साधनमाथि अनियमितता गरेको आरोप लागेको छ।

विवादरहित

जर्मनीको एउटा पत्रिकाले प्राप्त गरेको र बीबीसीले हेरेको उक्त दस्तावेजबाट मोस्याक फोन्सेकाले विश्वभरका धेरै मानिसहरुलाई समुद्रपारि कर छल्न सहज हुने ठाउँमा कम्पनी स्थापना गर्न सघाएको पाइएको छ।

राष्ट्रपति भ्लादिमिर पुटिनसँग सम्बद्ध एउटा रुसी ब्यांकले अर्बौं डलर बराबरको अवैध धन वैध बनाउने सञ्जाल चलाएको उक्त दस्तावेजबाट देखिएको छ।

तस्वीर कपीराइट AP

मोस्याक फोन्सेकाले आफूले ४० वर्षभन्दा बढी समयसम्म विवादरहित ढंगले काम गरेको र कहिल्यै फौजदारी आरोपको सामना गर्नु नपरेको जनाएको छ।

मोस्याक फोन्सेकासँग सम्बन्धित गोप्य दस्तावेज बाहिर आउनुबाट ६ साताअघि मात्र नयाँ अध्यक्ष पाएको अन्तर्राष्ट्रिय फुटबलको सर्वोच्च निकाय फिफा फेरि अर्को बेइज्जतीमा परेको छ।

नवनिर्वाचित अध्यक्ष जानी इन्फान्टिनोले संकटमा रहेको फिफाभित्रको अनियमितता हटाउने प्रतिबद्धता जनाएका थिए।

अनुसन्धान

फिफाको आचारसंहिता समितिका एकजना महत्वपूर्ण सदस्य उरुग्वेका वकिल हुआन पर्दो डामिआनी पनि जोडिएका छन्, जसबारे भ्रष्टाचारको आरोपमा पक्राउ परेका फिफाका पूर्व उपाध्यक्ष अयूखेनियो फिग्रेडोसँग सम्बन्ध रहेको विषयमा अमेरिकाले अनुसन्धान गरिरहेको छ।

गत मेमा स्वीट्जरल्याण्डमा फिग्रेडोलाई प्रहरीले पक्राउ गरेको थियो।

गोप्य दस्तावेजबाट फिग्रेडोसँग सम्बन्धित कम्तीमा ७ वटा कम्पनीलाई डामिआनी र उनको ल फर्मले कानुनी सहायता उपलब्ध गराएको देखिएको छ।

त्यसबारे प्रतिक्रिया दिन डामिआनी मानेका छैनन्।