ټرمپ د ناټو له غړو دفاعي لګښتونو کې د ونډې ډېرول غوښتي

د انځور حقوق Reuters
Image caption د اروپايي ټولنې چارواکي له ټرمپ څخه د ډېرې همکارۍ هیله لري.

د امریکا د متحدو ایالتونو ولسمشر ډونلډ ټرمپ برسلز کې د ناټو له غړو هېوادونو غوښتي، چې ټول باید په دفاعي لګښتونو کې خپله ونډه ډېره کړي. نوموړي د امریکايايي چارواکو هغې اندېښنې په ډاګه کولو سره، چې وايي نور کافي لګښت نه کوي ویلي:

''خورا ډېرې پېسې پاتې دي، چې باید ورکړل شي ''

نوموړي خپلو خبرو کې د برتانیا مانچسټر ځانمرګی برید یو ځل بیا وغانده او غوښتنه یې وکړه، چې باید ترهګري له جرړو ووېستل شي.

ښاغلي ټرمپ د ناټو نوي مرکز ته له تلو مخکې د فرانسې د نوي ولسمشر ایمانول ماکرون په ګډون له یو شمېر اروپايي مشرانو سره هم لیدلي دي.

نوموړي د مانچسټر برید په تړاو د خبرو پر مهال وویل:

د انځور حقوق Reuters

''زرګونه کسان زموږ هېوادونو ته راځي او ډېر کله موږ نه پوهېږو، چې دا کسان څوک دي، موږ باید سخت شو، موږ باید پیاوړي او ځېرک شو. ''

د بي بي سي خبریال جوناتهن مارکاس په وینا، امریکا غواړي د ناټول غړي هېوادونه داعش ضد اییتلاف کې ګډون وکړي ځینو اروپايي هېوادونو سره داسې اندېښنې شته، چې د اسلامي دولت نومې ډلې خلاف اتحاد کې د ناټو له ګډون سره به دغه اتحاد لیبیا او عراق کې له جګړو وروسته بحرانونو کې داسې ښکېل شي، لکه په افغانستان کې.

ناټو له ډونلډ ټرمپ سره منلې چې د داعش یا اسلامي دولت پرضد د امریکا په مشرۍ نړیوال ایتلاف سره یو ځای کېږي.

* افغانستان او د ناټو نننۍ سرمشريزه

* ناټو افغانستان ته اف ۱۶ جنګې الوتکې لېږدوي

* د ټرمپ اداره افغانستان ته د سرتېرو پر استولو وېشلې ده

دا هڅې د امریکا د هغه پلان برخه دي چې له مخې یې غواړي د داعش او ترهګرۍ ضد جګړه کې د لوېدیزو ملګرو ونډه ډېره کړي.

د ناټو سرمنشي هم ویلي، چې د داعش ضد ټلوالې سره د ناټو یو ځای کېدل د دې ډلې پرضد ځواکمن سیاسي یووالی ښيي.

د ښاغلي ستولتنبرګ په خبره، په ې همکارۍ کې استخباراتي او عملي هڅې شاملې دي، لکه د پوځي څارګرو الوتکو ډېر الوتونه.

خو زیاتوي چې ناټو به په یرغلیزو عملیاتو کې ګډون ونه کړي.

د انځور حقوق AFP
Image caption په بروکسېل کې د ډونلډ ټرمپ پرضد مظاهره.

د بي بي سي د خبریال په خبره، امریکا غواړي ناټو د داعش ضد ټلوالې سره یو ځای شي، خو ناټو اندېښنه لري، چې دا همکاري به یې د عراق او لیبیا له جګړې وروسته حالت سره مخ کړي، لکه په افغانستان کې هم چې داسې وشول.

ښاغلي ټرمپ د ناټو تړون پر نورو غړو له دې امله نیوکه کړې چې د ناخالص ملي تولید دوه سلنه برخه یې د دفاعي بودیجې لپاره ځانګړې کړې ده.

له دې مخکې د امریکا د بهرنیو چارو وزیر رېکس ټېلرسن خبریالانو ته ویلي، "چې ښاغلی ټرمپ په رښتیا غواړي چې د ناټو غړي هغه کارونه تر سره کړي چې مخکې یې ژمنه کړې".

ډونلډ ټرمپ د ناټو مرکز ته له تللو او وینا مخکې د فرانسې له نوي ولسمشر سره ولیدل.

بروکسېل ته د ولسمشر ټرمپ په رسېدلو سره د نوموړی پرضد لاریون هم وشو.

ورته مطالب