امریکایي سناتورانو له ولسمشر غني سره ولیدل

ارګ د انځور حقوق Arg
Image caption ولسمشر غني د امریکایي سناتورانو له پلاوي سره وکتل.

د امریکا د سنا د مجلس یوه پلاوي، چې مشري یې سناتورې نانسي پلوسي کوله، د پنجشنبې پر ورځ په کابل کې له افغان ولسمشر محمد اشرف غني او اجرائیه رئیس عبدالله عبدالله سره ولیدل.

د ارګ لخوا په خپره شوې اعلامیه کې راغلي چې دواړو خواو په افغانستان کې د روانې جګړې، د راتلونکو ټاکنو، اقتصادي ودې، د فساد پر ضد د افغان حکومت مبارزې او ګڼو نورو موضوعاتو خبې وشوې.

د ولسمشر ماڼۍ په خپله اعلامیه کې ویلي چې ولسمشر غني د افغانستان او امریکا پر دوه اړخیزو اړیکو ټینګار وکړ او زیاته یې کړه چې د سویلي اسیا لپاره د امریکا د ولسمشر ډونلډ ټرمپ د نوې ستراتېژۍ تر اعلانېدو وروسته اوس په ماحول کې مثبت بدلون تر سترګو کېږي.

افغان ولسمشر همدا رنګه امریکایي پلاوي ته ډاډ ورکړی چې حکومت یې د ولسي جرګې او د ولسوالیو د شوراګانو، او همدا رنګه د ولسمشریزو ټاکنو ترسره کولو ته ژمن دی.

د ارګ د خبرپاڼې له مخې، اجرائیه رئیس عبدالله عبدالله هم په بېلابېلو برخو کې د امریکا د دولت د مرستو مننه وکړه او زیاته یې کړه چې د همدې مرستو له برکته افغانستان او د امریکا متحده ایالات توانېدلي دي چې خپل ګډ دښمن وځپي.

د امریکایي سناتورانو د پلاوي مشرې نانسي پلوسي هم ویلي چې هېواد به یې تل د افغانستان تر څنګه ولاړ وي.

د نوموړې په وینا، د افغان حکومت د تېرو درېیو کالو لاسته راوړنې هیله بښونکې دي او امریکا به د ترهګرۍ پر ضد په روانه جګړه کې د افغان حکومت ملاتړ کوي.

د ارګ خبرپاڼه زیاتوي چې په دې ناسته کې د سولې پر خبرو او په دې پروسه کې د مېرمنو پر ونډه هم خبرې وشوې.

یاده دې وي چې امریکایي ولسمشر ډونلډ ټرمپ څو میاشتې وړاندې د سویلي اسیا او په ځانګړې توګه د افغانستان په اړه خپله نوې تګلاره اعلان کړه، او له پاکستانه یې په کلکه غوښتنه وکړه چې په افغانستان کې د سولې ټینګښت په برخه کې صادقانه مرسته وکړي.

افغان حکومت هم بیا بیا پر پاکستان تور لګولی چې د وسله والو طالبانو په ګډون د هغو ډلو ملاتړ کوي چې د افغان حکومت پر ضد جنګېږي.

ورته مطالب