د افغانستان د ټاکنیزو کمیسیونونو د غړیتوب کاندیدانو نوملړ ولسمشر ته سپارل شوی

انتخابات
Image caption د ټاکنیزو کمیسیونو غړیتوب لپاره نوماندان ولسمشر ته وپېژندل شول

د افغانستان د ټاکنیزو کمیسیونو د غړو د غوراوي کمېټې د خپلو وړاندیز کړو کسانو د نومونو لست ولسمشر ته سپارلی دی.

ددې کمېټې رییس جاوېد رشیدي نن د پنجشنبې په ورځ (عقرب/لړم ۲۰مه) په یوه خبري ناسته کې وویل؛ دوی ۲۱ کسان د ټاکنو خپلواک کمیسیون د غړیتوب او ۱۵ کسان د ټاکنیزو شکایتونو د ارزونې کمیسیون د غړیتوب لپاره ولسمشر ته ورپېژندلي دي.

د هغه په وینا، دوی دغه کسان د یوې میاشتې په لړ کې د ۷۲۰ داوطلبو کسانو له ډلې غوره کړي.

د غوراوي کمېټه د ټاکنو قانون له مخې په دغو بنسټونو کې د غړیتوب غوښتنلیکونه ترلاسه کوي او د داوطلبو کسانو شرایط ارزوي.

د افغانستان د ټاکنیزو کمیسیونونو د غړو د غوراوي کمېټه د ولسمشر د تقنیني فرمان له مخې جوړه شوه. دا کمېټه پنځه غړي لري چې د سترې محکمې، د بشري حقونو کمیسیون، د اساسي قانون پر پلي کېدو د څار کمیسیون، د مدني ټولنې او د ښځو ملاتړو ټولنو یو یو استازی پکې دي.

د ولسمشر د تقنیني فرمان له مخې، په دغو کمیسیونونو کې د غړیتوب شرایط دا دي چې لږ ترلږه په ټولنیزو علومو کې د لیسانس سند ولري، په دولتي یا غیردولتي بنسټونو کې یې ۱۰ کاله دنده ترسره کړې وي او لږ ترلږه ۳۵ کاله عمر ولري.

+ ولسمشر غني د ټاکنیزو اصلاحاتو تقنیني فرمان لاسلیک کړ

+ د ټاکنیز سیستم سمون لپاره د ټاکنو کمیسیون نوې طرحه

د غوراوي کمېټې غړي عبدالله شفاهي وایي؛ هغوی پر قانوني معیارونو سربېره، د ټاکنیزو کمیسیونونو غړیتوب ته د کسانو په غوراوي کې ترجیحي معیارونه هم په پام کې نیولي دي.

د هغه په وینا، لوړو زده کړو کې لوړې درجې، د پوهنتونونو اعتبار، د کاري تجربې څرنګوالی، د ژبو پوهېدو او کمپیوټر په برخو کې پوهاوی، عمر، قومي او جنسیتي ترکیب نور معیارونه دي چې په دغو غوراویو کې په پام کې نیول شوي دي.

د غوراوي کمېټې د کار په پایته رسېدو سره، ولسمشر محمد اشرف غني به د نویو ټاکنیزو کمیسیونونو د جوړېدو حکم ورکړي.

که څه هم ددغو دوو بنسټونو اوسنيو غړو څو ځلې د خپل کار پر دوام ټینګار کړی، خو د ولسمشر لخوا د نویو غړو په پېژندل کېدو سره به هغوی اړ شي چې دا حکم ومني.

د ټاکنیزو بنسټونو اصلاح او د هغوی به مدیریت کې بدلون د ملي یووالي حکومت د مشرانو له دوه کاله وړاندې ژمنو و، ځکه چې ددغو بنسټونو اوسني لوړپوړي مشران په ناسم مدیریت او ان په پراخه کچه په ټاکنیزو درغلیو کې په لاس لرلو تورن شوي دي.

د ټاکنیزو کمیسیونونو اوسني غړي هم د غوراوي کمېټې لخوا غوره شوي وو چې ترکیب یې د نوې غوراوي کمېټې په څېر و خو توپیر یې دا و چې هغې کې د مدني ټولنې استازی نه و.

وړاندې تردې د ټاکنو کمیسیون رییس احمد یوسف نورستاني او د دې کمیسیون د دارلانشا رییس ضیا الحق امرخېل له خپلو دندو استعفاوې کړې دي.

د غوراوي کمېټې د کار روڼوالي په تړاو نیوکه

د افغانستان د رڼو ټاکنو بنسټ (تیفا) غړې صغرا سعادت وایي؛ د ټاکنو څارونکي بنسټ په توګه ددغې کمېټې د کار د روڼتیا په تړاو نیوکه لري.

د هغې په وینا، ددغې بنسټ پرېکړې ددوی د څارونکو په نشتون کې کېدې او د غړیتوب د داوطلبو کسانو لپاره د اعتراض بهیر نه و.

هغې همداراز وویل؛ دوی ته موقع نه ده ورکړل شوې چې د مرکو له څرنګوالي څارنه وکړي.

خو د غوراوي کمېټې غړي وایي؛ هغوی د خپل ځان د امنیت لپاره اړ و چې ددې بهیر تر پایته رسېدو ځینې معلومات پټ وساتي.

د ټاکنو خپلواک کمیسیون د غړیتوب لپاره د وړاندیز شویو کسانو نوملړ

نوم ولایت ملیت عمر د زده کړو درجه
امان الله حبیبي جوزجان ازبک ۵۹ لیسانس
عبدالعزیز صمیم غور تاجیک ۴۲ لیسانس
محمد اشرف رسولی پروان تاجیک ۶۴ ماسټر
شهلا فرید فاریاب تاجیک ۵۵ ماسټر
عبدالبصیر امت تخار ازبک ۳۶ ماسټر
امان الله فصیحي میدان وردک هزاره ۳۶ دوکتور
عبدالله احمدي بامیان سادات ۳۸ لیسانس
محمد فرید افغانزی کابل پشتون ۳۷ ماسټر
رفیع الله بیدار ننگرهار پشه‌ای ۶۱ دوکتور
عبدالقادر قریشي بلخ ازبک ۳۹ لیسانس
معاذالله دولتي غور ایماق ۴۱ ماسټر
عبدالحمید فضل الله مجددي لوگر عرب ۵۹ لیسانس
ذکیه عادلي میدان وردک هزاره ۳۷ دوکتور
نجیب الله احمدزی پکتیا پشتون ۴۰ ماسټر
ملیحه حسن کابل هزاره ۴۴ ماسټر
گلاجان عبدالبدیع صیاد کابل پشتون ۴۳ دکترا
وسیمه بادغیسی بادغیس تاجیک ۳۶ ماسټر
نورعليخان ننگرهار پشتون ۴۲ ماسټر
مریم زرمتۍ پکتیا پشتون ۴۲ لیسانس
امین الله فضلي لوگر خواجه ۳۷ لیسانس
احمد جاوید حبیبي میدان وردک پشتون ۳۶ ماسټر

دټاکنیزو شکایتونو کمیسیون د غړیتوب لپاره د وړاندیزو شویو کسانو نوملړ

نام ولایت ملیت عمر د زده کړو درجه
عبدالرحیم برنا صالحي پنجشیر تاجیک ۴۰ ماسټر
غلام حیدر علامه بامیان هزاره ۴۴ دوکتور
محمد بشیر بهرام ننگرهار پشتون ۵۱ لیسانس
صادق باقري ارزگان هزاره ۴۴ دوکتور
غلام دستگیر هدایت میدان وردک پشتون ۵۳ ماسټر
عبدالعزیز آریایي بدخشان ازبک ۳۸ ماسټر
ثریا پیکان جوزجان تاجیک ۵۶ دوکتور
سعید مراد راهي تخار تاجیک ۳۸ ماسټر
حمیرا حقمل کابل پشتون ۴۸ لیسانس
عبدالبصیر فایز بدخشان تاجیک ۴۴ ماسټر
احمد ضیا خلالي تخار سادات ۴۷ لیسانس
حضرت الله تخار ازبک ۴۰ ماسټر
علی رضا روحاني غزنی هزاره ۴۷ ماسټر
محمد اجمل هوډمن میدان وردک پشتون ۳۸ لیسانس
شفیقه معابر ننگرهار پشتون ۴۸ لیسانس