''وسلوالو طالبانو د سولي پر غونډه برید کړی''

  • 10 جنوري 2017 - 21 مرغومی 1395
د انځور حقوق AP
Image caption هلمند کې له دې مخکې هم چاودنې او ځانمرګي بریدونه شوي

هلمند کې ځايي چارواکي وايي، وسلوالو طالبانو نن د لښکرګاه ښار په مرکزي برخه کې پر هغه غونډه ځانمرګي برید کړی، چې د ملي امنیت او د طالبانو د بېلي شوي ډلې یو شمېر مشرانو په کې ګډون درلود.

د دغه ولایت ویاند عمر ځواک بیا وایي، په دغه برید کې څلور تنه وژل شوي او اووه نور ټپیان دي.

د هلمند امنیه قومندان وایي، په دغه برید کې اووه تنه وژل شوي او څلور نور ټپیان دي، خو دا چي وژل شوي او ټپیان څوک دي، د پولیسو دغه مشر یې په اړه بې خبري ښیي.

هلمند کې ځانمرګي برید مرګ ژوبله اړولې

هلمند کې ځانمرګي برید پولیس په نښه کړي

بل لور ته د ملا محمد رسول د ډلې یوه سرچینه د ځانمرګي برید موخه د دوي ملګري یادوي او زیاتوي د دوی یو ملګري ملا ابراهیم ټپي شوی دی.

د یوې امنیتي سرچینې په خبره په دغه برید کي د هلمند لپاره د ملا محمد رسول د ډلې والي ملا ابراهیم او یو بل مشر ملا اوربل وژل شوي او د ملا الماس په نوم قومندان ټپي شوی دی.

ځواک د یوې پوښتني په ځواب کې وویل، وژل شويو او ټپیانو ملکي جامې اغوستې دي، خو دا یې و نه ویل، چې څوک دي .

راپورونه ښي، چې غونډه د ملي امنیت او د طالبانو د بیلې شوې ډلي د مشرانو تر منځ د سولې په اړه روانه وه.

وسلوالو طالبانو د دغه برید مسولیت منلی او ادعا کوي، چې د ملي امنیت پر یوه ځانګړې غونډه یې برید ترسره کړی او د لسګونو کسانو د وژلو خبره کوي.