"د پاکستان له بریدونو په لالپوره کې ۱۰۰ کورنۍ بې ځایه شوې"

  • 17 فبروري 2017 - 29 سلواغه 1395
د انځور حقوق .
Image caption په دې بریدونو کې دوه ماشومان ټپیان شوي دي.

د افغانستان په ختیځ ننګرهار ولایت کې ځايي چارواکي وايي، چې د پاکستان پوځ لالپورې و لسوالۍ ته "په لسګونو توغندي" توغولي دي.

د والي ویاند عطاالله خوګیاڼي بي بي سي ته وویل، چې تر دې دمه په دې بریدونو کې دوه ماشومان ټپي شوي او ۲۰ کورونه وران شوي دي.

د هغه په خبره، "له دې توغندويي بریدونو تر ۱۰۰ پورې کورنۍ امن سیمو ته لېږدېدلې دي".

دا ادعا له هغه وروسته ده چې د پاکستان په سیند ایالت کې یوه ځانمرګي په لال شهباز قلندر زیارت کې تر ۸۰ پورې کسان ووژل او تر ۲۵۰ نور یې ټپیان کړل.

* کرزی: 'افغانستان ډيورنډ کرښه نه منلې نه يې مني'

* کرزی: پاکستان سره د نژدې کېدو هڅې مو ناکامې شوې

* اشرف غني: د وروستیو بریدونو عاملان پاکستان کې دي

له دغه برید وروسته د پاکستان پوځ په اسلام اباد کې د افغان سفارت چارواکي ور بللي او په افغانستان کې د "ترهګرو " پرضد د سملاسي عملیاتو غوښتنه یې ترې کړې ده.

د پوځ د عامه اړیکو مشر تورنجنرال اصف غفور د جمعې په ورځ په یوه ټوېټ کې لیکلي، چې افغان چارواکو ته یې د داسې ۷۶ "ترهګرو" نوملړ ور کړی، چې په افغانستان کې استوګن دي.

د نوموړي په خبره، افغان چارواکو ته یې دا هم ویلي، چې د دغو "ترهګرو" پرضد عملیات وکړي او پاکستان ته یې وسپاري.

د انځور حقوق Getty Images
Image caption په لال شهباز قلندر زیارت کې ځانمرګي تر ۸۰ پورې کسان ووژل.

خو د ارګ له خوا خپره شوې بیانیه کې افغان ولسمشر اشرف غني په لال شهباز قلندر زیارت کې برید غندلی دی.

په دغه بیانیه کې د ولسمشر غني له خولې راغلي "تروریستانو یو ځل بیا ثابته کړه چې په اسلامي او انساني ارزښتونو باور نه لري ".

ولسمشر غني ترهګر د ټولو هېوادونو ګډون دښمن بللي او هیله یې ښودلې چې پر ضد یې رښتونې مبارزه وشي.

د ملګرو متلونو سرمنشي او د نړۍ د نورو هېوادونو مشرانو هم په سیند ایالت کې دغه برید غندلی دی.

د پاکستان پوځ له په زیارت کې له دغې چاودنې وروسته عملیات پیل کړي او وايي، تر دا مهاله یې ۲۵ وسلوال وژلي او په لسګونو نور یې نیولي دي.

د انځور حقوق Twitter
Image caption دا لومړی ځل دی چې افغان ډیپلوماټان د شکایت لپاره د بهرنیو چارو وزارت پر ځای د پوځ له خوا بلل کېږي.

په کونړ کې د افغان سرتېرو وژنه

له بلې خوا د افغانستان په کونړ ولایت کې ځايي چارواکي وايي، چې د ماڼوګي ولسوالۍ په ری سلام سیمه کې وسلوالو طالبانو د پولیسو پر پوسته برید کړی دی، چې له امله یې پنځه سرتېري وژل شوي دي.

د کونړ د امنیه قومندانۍ ویاند فرید دهقان له بي بي سي سره په خبرو کې وویل، وسلوالو تېره شپه دا برید کړی دی.

د هغه په خبره، افغان پولیسو سملاسي ځوابي برید کړی، خو په دې نښته کې یو پولیس ورک شوی دی.