افغانستان د ماشوم ځورونې او بچه بازۍ د مخنیوي قانون جوړ کړ

د انځور حقوق AFP
Image caption د افغانستان په ځینو سیمو کې د تنکیو هلکانو ځورونه، ګډول یا بچه بازي له ډېرو کلونو مخکې موجوده وه، چې په وروستیو څو کلونو کې لا پراخه شوې.

افغان حکومت په لومړي ځل د ماشومانو د ځورونې او له بچه بازۍ سره د مبارزې په موخه قانون جوړ کړی دی. د افغانستان د عدلیې وزارت چارواکي وايي د دغه قانون مسوده د کابینې له خوا تایید شوې او نور پړاوونه یې هم دوام لري.

د ماشومانو د ملاتړ قانون په طرحې کې د بچه بازۍ عاملانو ته سزا هم په پام کې نیول شوې ده.

افغانستان کې بچه بازي ډېره شوې ده

"د پولیسو لیکو کې له کوچنیانو نه د جنسي ګټې تورونه دې وڅېړل شي"

کابل کې زموږ همکار خوشحال تایب پخپل راپور کې لیکي، تر دې مهاله د افغانستان په قانون کې د بچه بازۍ عاملانو ته ځانګړې سزا نه وه معلومه، خو د بشري حقونو د بنسټونو تر هڅو وروسته اوس افغان حکومت لاس په کار شوی او له بچه بازۍ سره د مبارزې موضوع یې د ماشومانو څخه د ملاتړ په یوې پراخې طرحې کې را اخیستې ده.

د عدلیې وزارت ویاند امان ریاضت په دې اړه بي بي سي ته وویل:

"بچه بازي او نور غیر اخلاقي او غیر انساني حرکتونه جرم ګڼل شوی او د جزا په کود کې سزا ورته ټاکل شوې ده."

ښاغلی ریاضت وايي دغه طرحه د افغانستان د وزیرانو شورا له خوا تایید شوې او نورو پړاوونه یې هم روان دي.

د هغه په وینا، د دغې طرحې د لا بډاینې لپاره به د دیني عالمانو او قانون پوهانو سره سلا مشورې وکړي او وروسته به یې د تصویب په موخه ملي شورا ته واستوي، چې د ولسمشر له خوا تر منلو وروسته به عملي کېږي.

پوښتنه دا ده چې دغه طرحه به د قانون له ساتونکو سره څه مرسته وکړي، دا پوښتنه مو د پروان ولایت له امنیې قومندان محمد زمان مموزي څخه وکړه:

Image caption ځینې وخت هلکانو ته ښځینه جامې وراغوستل کېږي او په خپلو محفلونو کې یې ګډوي.

"د افغانستان د اساسي قانون په ګډون په ټولو قوانینو کې د یوه شخص ازار او اذیت جرم دی، په دې اړه که قانون یا سرې کرښې جوړېږي موږ یې پلویان یو."

څنگه د"بچه بازۍ"مخه نيول کېداى شي؟

"بې وزلې ماشومان د بچه بازۍ اصلي قربانیان دي"

د افغانستان په ځینو سیمو کې د تنکیو هلکانو ځورونه، ګډول یا بچه بازي له ډېرو کلونو مخکې موجوده وه، چې په وروستیو څو کلونو کې لا پراخه شوې.

په تېره بیا زورواکان له تنکیو ځوانانو د جنسي مریو په توګه کار اخلي. ځینې وخت دغو هلکانو ته ښځینه جامې وراغوستل کېږي او په خپلو محفلونو کې یې ګډوي.

اړونده مطالب