د ملي یووالي حکومت مشرانو د ټاکنو کمیسیون دارالانشاء ریاست کاندیدانو سره مرکې وکړې

د دارلانشا له کاندیدانو سره مرکه د انځور حقوق ARG FB

د افغانستان د ټاکنو خپلواک کمیسیون د دارالانشا مشرۍ ته د کاندیدانو د مرکو بهیر نن په ولسمشرۍ ماڼۍ کې ترسره شو.

د ټاکنو خپلواک کمیسیون ته د نویو کمیشنرانو معرفي کول او د خالي څوکیو ډکول یې د ملي یووالي حکومت له پيله یوه جنجالي موضوع وه.

وړاندې د ټاکنو خپلواک کمیسیون وړاندې دغې څوکۍ ته درې نوماندان ولسمشرۍ ماڼۍ ته ورپېژندلي و، خو د ارګ لخوا رد شول او له کمیسیون نه یې وغوښتل چې د کاندیدانو شمېر ډېر کړي.

د افغانستان د ټاکنو قانون له مخې، د ټاکنو خپلواک کمیسیون رییس د دغه کمیسیون د غړو په توافق وړاندیز کېږي او د ولسمشر تر تایید وروسته ټاکل کېږي.

د ۲۰۱۴ کال تر جنجالي ولسمشریزو ټاکنو وروسته د حکومت دواړو مشرانو اجراییه رییس عبدالله عبدالله او ولسمشر محمد اشرف غني په سیاسي هوکړه لیک کې د افغانستان په ټاکنیزو نظام کې د اصلاحاتو ژمنه وکړه.

+ ولسمشر غني د ټاکنیزو کمېسونونو کمېشنران اعلان کړل

+ د ټاکنو په نوي قانون کې ټاکنیزه درغلي جرم ګڼل شوی

شاوخوا درې میاشتې وړاندې د ټاکنیزو کمیسیونونو نویو کمیشنرانو په کار پیل وکړ. که څه د دارالانشاء څوکۍ لپاره یوه میاشت کاندیدان پېژندل شوي و، خو دا څوکۍ لا هم تشه ده.

د ولسمشرۍ ماڼۍ مرستیال ویاند شاه حسین مرتضوي بي بي سي ته وویل، د افغانستان د ټاکنو خپلواک کمیسیون د دارالانشا مشرۍ ته د کاندیدانو د مرکو بهیر نن په ولسمشرۍ ماڼۍ کې د ملي یووالي حکومت د مشرانو په حضور کې ترسره شو.

مرتضوي وویل؛ لومړنی غوراوی د ټاکنو کمیسیون له خوا شوی او د غوره شویو کاندیدانو لست ولسمشرۍ ماڼۍ ته ورلېږل شوی دی.

د دارلانشاء څوکۍ له کاندیدانو سره داسې مهال مرکې کېږي چې دوه ورځې وړاندې د ټاکنو خپلواک کمیسیون مشر نجیب الله احمدزي د یوه مناسب کاندید په غوره کولو کې د ځنډ له امله پر حکومت نیوکه کړې وه.

ولسمشر ماڼۍ وایي؛ له کاندیدانو سره تر مرکې وروسته به ډېر ژر د ټاکنو خپلواک کمیسیون د دارلانشاء نوی رییس وپېژندل شي.

ولسمشرۍ ماڼۍ وایي، داسې کس به دغه پوسټ ته ونوموي چې عملي تګلارې او د ښه مدیریت وړتیا ولري.

د افغانستان د ولسمشرۍ ماڼۍ د معلوماتو له مخې خواجه محمد عصامي، عبدالرحیم داوود رحیمي، پوپل حبیبي، عبدالعزیز صمیم، احمدالله ارچیوال، امام محمد وریماچ، احمد شاه زمانزی او سیدجمال الدین صاحب‌زاده هغه کاندیدان و چې په مرکه کې یې برخه واخیسته.

د دارلانشاء ریاست د افغانستان د ۲۰۱۴ کال ولسمشریزو ټاکنو د جنجالونو یوه برخه وه.

د دارلانشاء پخواني رییس ضیاو الحق امرخېل د ولسمشریزو ټاکنو د یوه کاندید عبدالله عبدالله لخوا په ۲۰۱۴ کال کې د پراخو درغلیو په تنظیمولو تورن شو.

ښاغلي امرخېل دا تورونه رد کړل او له خپلې دندې یې استعفا وکړه.

+ د ټاکنو کمېسيون د دارلانشاء مشر استعفا وکړه

+ نورستاني: د دارالانشاء پر مشر تورونه 'بابیزه' دي