'د افغانستان اقتصادي وده دوه سلنه'

د انځور حقوق Getty Images

افغان چارواکي وایي، په ۱۳۹۵ مالي کال کې اقتصادي وده نژدې دوه فیصده وه، هغه هم په داسې حال کې، چې لسګونه زره بهرني سرتېري چې دوه کاله وړاندې د اقتصادي ودې لویه سرچینه وه، اوس له افغانستانه وتلي دي.

افغان حکومت د اقتصادي ودې بنسټیز لاملونه د کورنیو عوایدو زیاتوالی، صادرات، پانګونه او بېلابېلو سوداګریزو لارو ته لاسرسی بولي.

د افغانستان د اقتصاد وزارت د ۱۳۹۵ مالي کال اقتصادي وده یو ښه زېری بولي ځکه چې په ۱۳۹۴ مالي کال کې اقتصادي وده منفي دوه فیصده وه.

ولسمشر غني: ګاونډیان دې د بندونو له جوړېدو نه اندېښمنېږي

''افغانستان یوازې خپلې ۳۰ سلنه اوبه کاروي''

د اقتصاد وزارت او احصایې مرکزي ادارې د شمېرو له مخې د ۱۳۹۵ مالي کال اقتصادي وده هیله بښونکې وه.

د سوداګرۍ وزارت ویاند مسافر قوقندي وایي، پر دې سربېره له کورنیو تولیداتو ګټې اخیستنې هم عواید لوړ کړي دي.

قوقندي زیاته کړه چې د ولسمشر د نوې لارښوونې له مخې به له دې وروسته د امنیتي ځواکونو ځینې لګښتي مواد لکه وریجې او میوه له کورنیو تولیداتو برابريږي.

د مالیې وزارت ویاند اجمل عبدالرحیمزي بیا د سوداګرۍ او اقتصاد وزارتونو له ویاندویانو سره په ګډه خبري ناسته کې وویل، د کورنیو عوایدو لوړیدو هم پر اقتصادي ودې مثبت اغیز کړی.

''زمونږ لپاره د عوایدو هدف ۱۳۲ میلیارده افغانۍ ټاکل شوی و، خو د مالي کال تر پایه یعنی د قوس تر دېرشمې نېټې پورې مونږ ۱۶۵ میلیارده افغانۍ ترلاسه کړې، نو له هدف څخه ۳۳ میلیارده ډالره مخکې یو، د ۱۳۹۴ کال پرتله دا عواید ۴۳ میلیارده ډېر وو، د عوایدو د ډیریدو دلیل دادی چې مونږ په عایداتي سرچینو کې اصلاحات راوستي، فساد سره مو مبارزه کړې او ګومارنې مو د وړتیا له مخې کړي دي. ''

د انځور حقوق Getty Images
Image caption د نړیوال بانک د شمېرو له مخې اوس هم د افغانستان ۶۰ فیصده لګښتونه پر نړیوالو مرستو ولاړ دي

په اقتصادي او مالي برخه کې د لاسته راوړنو له امله د بروکسل په وروستۍ غونډه کې نړیوالو افغان حکومت ته د راتلونکو څلورو کلونو لپاره د پنځلس میلیارده ډالرو ژمنه ورکړه.

د اقتصادي چارو شنونکي او د سوداګرۍ خونې د نړیوالو اړیکو رئيس اذرخش بیا وایي، د نړیوالو اوسني مالي ملاتړ ته په کتو په ۱۳۹۵ مالي کال کې نژدې دوه فیصده اقتصادي وده لږ ده.

د نړیوال بانک د شمېرو له مخې اوس هم د افغانستان ۶۰ فیصده لګښتونه پر نړیوالو مرستو ولاړ دي. داسې انګیرل کېږي که افغان حکومت مالي چارې رڼې کړي، اقتصادي وده به نوره هم زیاته شي.

اړونده مطالب

ورته مطالب