کابل کې د خونړي بریدونو نېټې او مرګ ژوبله

افغانستان کې د جګړې له دوام سره د بریدونو ول هم بدل شوی. ځانمرګي بریدونه تر پخوا پېچلي شوي او د ځینو موخه ځانګړي خلک یا ډله وي چې یو شمېر یې پلازمېنه کابل کې تر سره شوي.

تېر یوه نیم کال کې پلازمېنې کابل کې تر ټولو د بدو بریدونو نېټې او جزییات داسې دي:

۲۰۱۷

  • د جنورۍ ۱۰: د افغان پارلمان ودانۍ ته نژدې په دوو ځانمرګو بریدونو کې نژدې ۳۸ کسان ووژل شول ۸۶ نور ټپیان شول.
  • د فبرورۍ ۷: یوه ځانمرګي بریدګر د سترې محکمې د کارکوونکو ترمنځ ځان والوځوه چې ۲۰ کسان په چاودنه کې ووژل شول او ۴۱ ټپیان شول. د دې برید مسولیت کومې ډلې پر غاړه وانه خیست.
  • د مارچ ۱: د کابل د پولیسو پر شپږمې امنیتي حوزې برید کې ۱۶ کسان ووژل شول.
  • د مارچ ۸: ناپېژاندو کسانو د روغتیاپالو په کالیو کې د کابل تر ټولو لوی پوځي روغتون سردار محمد داوود خان برید وکړ. دغه برید کې لږترلږه ۵۰ کسان ووژل شول او ۱۰۰ نور ټپيان شول. د دغه برید مسولیت داعش نومې ډلې پر غاړه واخیست. عیني شاهدان ټینګار کوي چې دغه برید کې تر ۱۰۰ کسانو پورې ووژل شول.
  • د مې ۳: یوه درانه ځانمرګي برید چې د کابل مکروریانو سیمه کې یې هدف د امریکايي سرتېرو کاروان و، اته کسان ووژل او ۲۸ نور یې ټپیان کړل.
  • کابل: ۳۱ مې ۲۰۱۷- یو ستر لارۍ بم د کابل دیپلوماتیکي سیمې کې د چهارشنبې په ورځ وچول شو چې ټوله سیمه یې په بل مخ کړه. دغه برید کې لږترلږه ۸۰ کسان ووژل شول او تر ۳۵۰ ډېر کسان ټپیان شول.
پر کابل برید د انځور حقوق Getty Images

۲۰۱۶

  • د جنورۍ ۲۰: د طالبانو یوه ځانمرګي بریدګر خپل موټر د طلوع خصوصي تلوېزیون د کارکوونکو له بس موټر سره وجنګاوه، چې د دغه تلویزیون اووه کارکوونکي یې ووژل. دا پر افغان خبري رسنیو لومړنی لوی برید و.
  • د فبرورۍ ۱: کابل کې د پولیسو پر یوه مرکز د طالبانو ځانمرګي برید کې ۲۰ پولیس ووژل شول او ۲۹ نور ټپیان شول.
  • د فبرورۍ ۲۷: یوه ځانمرګي بریدګر د دفاع وزارت مخې ته ځان والوزوه چې ۱۲ کسان یې ووژل. طالبانو وروسته د برید مسولیت پر غاړه واخیست.
  • د اپرېل ۱۹: د ښار مرکز کې یوه لارۍ بم او له هغه وروسته د ټوپک ډزو کې ۶۴ کسان ووژل شول او تر ۳۴۰ ډېر ټپیان شول. طالبانو ویل د دوی ملګرو کړی دی.
  • د مې ۲۵: د کابل په ختیځې څنډې کې د محکمې د کارکوونکو پر بس طالبانو ځانمرګی برید وکړ چې ۱۰ کسان په کې ووژل شول.
  • د جون ۲۰: د طالبانو په یوه برید کې ۱۴ نیپالیان چې د لوېدیځو هېوادونو د سفارتونو امنیت یې ساته د کابل په څنډو کې ووژل شول.
  • د جون ۳۰: د طالبانو له خوا د پولیس محصلینو پر موټرونو غبرګو ځانمرګو بریدونو ۳۰ کسان ووژل.
  • د جولای ۲۳: اسلامي دولت نومې ډلې، داعش د هغو دوو چاودنو مسولیت پر غاړه واخیست چې پر شیعه مظاهره چیانو وشوه، لږترلږه ۸۵ کسان یې ووژل او تر ۴۰۰ ډېر یې ټپیان کړل.
د انځور حقوق Getty Images
  • د اګست ۲۵: د افغانستان پر امریکايي پوهنتون د وسله والو په برید کې چې نژدې لس ساعته یې دوام وکړ، ۱۶ کسان ووژل شول. چا یې مسولیت ونه منه.
  • د سپتمبر ۵: دفاع وزارت ته څېرمه د طالبانو په غبرګو بریدونو کې ۴۱ کسان ووژل شول او تر ۱۰۰ ډېر ټپیان شول.
  • د همدغې ورځې په شپه، درېیم برید چې پړه یې چا وانه خیسته، د پاملرنې نړیواله موسسه یې د کابل په زړه کې هدف وګرځوله چې شپږ کسان په کې ټپیان شول.
د انځور حقوق Getty Images
  • د اکتوبر ۱۲: اسلامي دولت نومې ډلې، داعش د هغه برید مسولیت ومنه چې کارته سخي سیمه کې د عاشورا پر ورځ د سخي زیارت کې یې لږترلږه ۱۸ کسان ووژل.
  • د اکتوبر ۱۹: د یوه ولسي وګړي په ګډون دوه امریکایان هغه مهال ووژل شول چې یوه وسله وال کابل کې د ناټو یوه مرکز ته نژدې ډزې پیل کړې.
  • د نومبر ۲۱: کابل کې د شیعه ګانو پر یوه جومات ځانمرګي برید کې لږترلږه ۲۷ کسان ووژل شول او ۶۴ نور ټپیان شول. داعش نومې ډلې د برید مسولیت ومنه.
د انځور حقوق Getty Images